Մարիամ Մաթևոսյան
Սյունիքի մարզի Շուռնուխ գյուղումշարունակվում են համայնքի ղեկավարի ընտրությունները: Դպրոցի շենքում տեղակայված ընտրատեղամասում ութ անդամից կազմված հանձնաժողովը «անհամբեր» սպասում է ընտրողներին, բայց բնակիչներին ընտրություններն ասես չեն հետաքրքրում: 110 ընտրող ունեցող համայնքում ժամը 17:00-ի դրությամբ ընտրատեղամաս է ներկայացել 52 ընտրող:
Համագյուղացիներին շուռնուխցի Արմեն Հարությունյանը փորձում է «արդարացնել»՝ ասելով. «Մեր գյուղն ուշ է «արթնանում», շտապելու տեղչունենք, մեկ է՝ մինչեւ ժամը 20:00-ն ժամանակ ունենք»:
Հանձնաժողովի նախագահ Ռոբերտ Հակոբյանի խոսքով`մինչ այժմ խախտումներ, անվավեր թերթիկներ չեն եղել: «Դեռ սպասում ենք ընտրողներին»,-ասում է նա:Ընտրապայքարում մենակ մնացած գործող գյուղապետ Հակոբ Արշակյանին առավոտյան են բնակիչները տեսել: Երբ փորձեցինք կապ հաստատել նրա հետ, զրույցն այդպես էլ կիսատ մնաց: Ներկայանալուց հետո լսափողից այն կողմ լսվում էր. «Բաժանորդն անջատել է հեռախոսը կամ գտնվում է ռադիոծածկույթից դուրս»:
Նշենք, որ Հակոբ Արշակյանը պաշտոնավարում է 2004 թվականից:
Ընտրատեղամասում ընտրողներ չգտնելով՝ այցելեցինք մի քանի գյուղացիների տներ:
Նրանցից մեկը՝ ազատամարտիկ կին, ով չցանկացավ ներկայանալ, մեր հարցին, թե ինչու չի գնում ընտրության, կտրուկ պատասխանեց. «Չեմ էլ գնալու, ինձ ընտրություն պետք չէ: Ոչ երկիրն է երկիր, ոչ մարդը`մարդ: Գնամ, ի՞նչ անեմ, գալու են գյուղի ջրամբարները մաքրե՞ն, բացել-տեսել ես մեջն ինչեր կան, դրա համար ոչ երեխու բերանն ատամ կա, ոչ՝ մեծինը»:
Ի տարբերություն համագյուղացու՝ Հայկ Հակոբյանի համար կարևոր է իր քվեն ու չի արդարացնում նրանց, ովքեր մտածում են, որ մեկ է՝ իրենց ձայնը ոչինչ չի կարող փոխել, կամ միևնույն է՝ մեկ թեկնածու է, ինքն էլ կընտրվի: «Սխալ կհամարեի իմ չգնալը, ի վերջո, եթե կողմչես, կարող ես դեմ լինել, բայց չգնալն արդարացված չէ»,-ասում է նա, հետո ավելացնում է, որ իր ձայնը տեղ հասցնելու համար Գորիսի աշխատանքային վայրում թողած անձնագիրը, ձեռքից ձեռք անցնելով, մի կերպ հասցրել է Շուռնուխ: «Առաջին անգամ էի ընտրության մասնակցում, փորձ էր պետք»,- ավելացնում է զրուցակիցս:
hetq.am
