Քրիստինե Հայրապետյան
Այսօր Գորիսի քաղաքապետարանում Ազգային Հիփոթեքային Ընկերությունը ներկայացրեց «Ջերմ օջախ» վարկային ծրագիրը :
«Ջերմ օջախ» ծրագրի նպատակն է հնարավորություն ընձեռել ցածր և միջին եկամուտ ունեցող ընտանիքներին իրականացնել բնակարանների վերանորոգում, բարելավել կենսապայմանները, նվազեցնել բնակարաններում էներգիայի ծախսերը, ինչպես նաև խթանել էներգախնայող բնակարանային ֆոնդի զարգացումը Հայաստանի քաղաքներում և գյուղերում:
Ծրագիր սկսել է գործել 2014թ. հուլիսից և իրականացվում է Ֆրանսիայի զարգացման գործակալության և Եվրոպական հարևանության ներդրումային հաստատության աջակցությամբ: «Ֆրանսիայի զարգացման գործակալությունը տրամադրել է մոտավորապես 13 մլն դոլարի միջոցներ, որը մենք տրամադրում ենք մեր բնակչությանը՝ բնակարանային պայմանները բարելավելու,վերանորոգում իրականացնելու նպատակով»,- նշեց Ազգային Հիփոթեքային Ընկերություն տնօրեն Հայկ Ոսկանյանը:
Ծրագրի շրջանակներում տրամադրվում է երկու վարկատեսակ՝միկրո կամ փոքր վերանորոգման վարկեր (500- 4,000 եվրոյին համարժեք դրամ) և միջին էներգիախնայող վարկեր(4,001- 10,000 եվրոյին համարժեք դրամ)՝11%-14%տոկոսադրույքով, 6 ամսից մինչև 2 տարի վճարման արտոնյալ ժամանակահատվածով և 5-10 %դրամաշնորհ ստանալու հնարավորությամբ՝կախված էներգաարդյունավետության բարձրացմանն ուղղված ծախսերի ընդհանուր գումարից և ստացված էներգախնայողության ծախսերից:
Հայկ Ոսկանյանը ներկայացրեց նաև վարկատեսակի մի քանի առավելությունների մասին, որոնիցի մեկն այն է, որ վարկերը տրվում են միայն ՀՀ դրամով:
Լուսանկարները՝ Արևիկ Աբելյանի
