Մարիամ Մաթևոսյան
Սվարանցցի Ալվարդ Առաքելյանը գտնում է, որ համայնքները կխոշորացվեն անգամ եթե բնակիչները դեմ քվարկեն, բայց եւ նշում, որ եթե իշխանությունների ուշադրության կենտրոնում չլինի գյուղերի «մարումը»` ավելի լավ է չխոշորացնեն: «Տու չպիտի եկած ինեիր է˜, այլ վերադասներից. կյար տեսնար, որ դպրոց չկա, խանութ չկա, հացի մատակարարում չկա, տրանսպորտ չկա, գյուղում ոչ մի բան էլ չկա: Հիվանդ մարդիկ ենք, եթե հանկարծ շտապ օգնություն կանչեմ, ասեմ մեռնում եմ, համոզված եղի` մեքենա չի կյալու»,-դժգոհում է նա ու ավելացնում, որ եթե պետությունը շարունակի համայնքների հետ նույն ձեւով վերաբերվել, ուրեմն հանրաքվեն ավելորդություն է:Ա. Առաքելյանը պատմում է, որ ինչպես նա, ամուսին ու տղան եւս Ռուսաստանի Դաշնության քաղաքացիություն ունեն, ու այսօր տեղական հանրաքվեում իրենք ձայնի իրավունք չունեն, բայց ամեն ընտրություններում իրենց անուններն ընտրական ցուցակներում ներառված են. «Երբեւէ մենք ընտրության չենք գնացել, բայց մեր «այո»-ները հավաքել-տարել են: Հիմա ընտրություն չկա, խաբեբայություն ա»:
328 բնակչություն ունեցող Սվարանց համայնքում, ընտրելու իրավունք ունեն 224 ընտրող: Համայնքապետարանի շենքի Կենցաղի տուն անվանմամբ սենյակում տեղակայված է թիվ 37/1 ընտրատեղամասը: ժամը 17:00-ի դրությամբ իր քաղաքացիական պարտքն է կատարել 101 ընտրող:
Հանձնաժողովի նախագահ, ՀՀԿ անդամ Արծրուն Միրզաթունյանի խոսքով` ընդհանուր առմամբ հանրաքվեն անցնում է խաղաղ պայմաններում, բնակիչները շարունակում եմ ընտրատեղամաս ներկայանալ:
Ընտրական հանձնաժողովում ընդգրկված են նաև ԲՀԿ, ՕԵԿ, ՀՅԴ, ՀԱԿ, Ժառանգություն կուսակցությունների ներկայացուցիչներ:
«Գյուղ որտեղից, որ խոշորացումից էլ օգուտ սպասենք, ինչքան գանք հետ ենք գալու, առաջխաղացում չկա: Ծերացող գյուղ է` մեծերով բնակեցված»,-նշում է Քնարիկ Դանիելյանը:
Ժամանակին Սվարանցում փաստացի 162 ընտանիք էր ապրում, իսկ հիմա գյուղում մոտ 54 ծուխ կա: Երիտասարդներ գրեթե չկան:
«Գյուղն ապագա կունենա, եթե գազ ունենաք, մանկապարտեզ, մեր երեխաները բան չեն տեսնում, լավ վերանորոգված դպրոց ունենաք, որ աշակերտները փլատակների տակ դաս չանեն»,-ասում է բնակիչներից մեկը:
hetq.am
