Շուշան Օհանյան
Այսօր՝ մայիսի 17-ին, համայնքների խոշորացման վերաբերյալ հանրաքվե է անցկացվում Սյունիքի մարզի Տաթև գյուղախմբի 8 համայնքներում:
Ժամը 17:45-ի դրությամբ Տաթևում 561 ընտրողներից իրենց քաղաքացիական պարտքն են կատարել 415-ը:
Տաթև համայնքի գյուղապետ Մուրադ Սիմոնյանի կարծիքով տաթևացիները վերջին մի քանի ամիսների ընթացքում խոշորացման մասին ստացել են բավարար ինֆորմացիա և կկարողանան ճիշտ որոշում կայացնել:
«Մարդիկ ընդունում են խոշորացման գաղափարը՝ մտածելով, որ համայնքային մի շարք հիմնախնդիրներ այս գործընթացի արդյունքում կլուծվեն: Կարծում եմ, որ խոշորացումը դրականորեն կանդրադառնա նաև տուրիզմի զարգացման վրա»,-նշում է Տաթև համայնքի ղեկավարը:Այն հարցին, թե արդյոք վարչական ապարատի կրճատման արդյունքում տնտեսված միջոցները կբավականացնեն ենթակառուցվածքների զարգացման համար, Մ. Սիմոնյանն ասաց. «Չեմ կարծում, որ ամեն գյուղում երկու-երեք աշխատատեղ կրճատլով, հնարավորություն կստեղծվի լուծել համայնքների առջև ծառացած կարևորագույն հիմնախնդիրներ: Ինձ թվում է՝ դրա համար լուրջ ներդրումներ են պետք, համագործակցություն՝ միջազգային կազմակերպությունների հետ»:
Տիկին Ռամելան, ի տարբերություն շատ տաթևացիների, կողմ է խոշորացմանը, բայց միայն այն դեպքում, երբ տված խոստումները կատարեն:
«Խոստումներ շատ են տալիս, բայց իրագործող չկա: Եթե խոշորացումից հետո այնպիսի պայմաններ են ստեղծվելու, որ երիտասարդները գյուղից չգնան, թող խոշորացնեն: Մենք էլի հարմարվում, ապրում ենք, բայց երիտասարդներն առաջին հնարավորության դեպքում, լքում են գյուղը, ու ես չեմ կարող նրանց մեղադրել: Մնան՝ ի՞նչ անեն»,-ասում է Ռամելան:
Իսկ ահա տաթևացի Սերյոժան դեմ է խոշորացմանը. «Ես չեմ հավատում, որ գյուղում առաջընթաց կլինի: Քայլեք գյուղում ու տեսեք, թե ինչքան փակ դռներ կան, մարդիկ լքում են գյուղը. մնացել են ծերերը ու նրանք, ովքեր հնարավորություն չունեն դուրս գնալու»:
Խոսակցությանը միացած մյուս տաթևացին՝ Չարժոկը, ավելացրեց. «Հիմա որ գյուղում գա մի ինքնաթիռ կանգնի, ասի բոլորիդ ձրի տանում եմ, գյուղում մարդ չի մնա»:
hetq.am
