Մայիսի 22-ին Սյունիքի մարզի Կապան քաղաքում քննարկվեց ԱՄՆ Միջազգային զարգացման գործակալության (ԱՄՆ ՄԶԳ) ֆինանսավորմամբ իրականացվող “Մաքուր էներգիա և ջուր” ծրագրի շրջանակներում ստեղծված Հարավային ջրավազանային կառավարման պլանի նախագիծը:
Քննարկմանը ներկա էին բոլոր շահագրգիռ կողմերը. ՀՀ Բնապահպանության նախարարության (ԲՊՆ), ՀՀ ԲՊՆ աշխատակազմի Ջրային ռեսուրսների կառավարման գործակալության (ՋՌԿԳ), Հարավային ջրավազանային տարածքային կառավարման բաժնի, ինչպես նաև ՀՀ Գյուղատնտեսության, Տարածքային կառավարման և արտակարգ իրավիճակների նախարարությունների ներկայացուցիչներ, տարածաշրջանային և տեղական կառավարման գերատեսչությունների պաշտոնյաներ, հասարակական կազմակերպություններ:
Հանդիպման ընթացքում “Մաքուր էներգիա և ջուր” ծրագրի փորձագետները ներկայացրին նախագծի կառուցվածքն ու մշակման գործընթացը, ճնշումների և ազդեցությունների վերլուծությունների արդյունքները , մակերևույթային և ստորերկրյա ջրային մարմինների տարանջատումը, ինչպես նաև այս նախագծով սահմանված բնապահպանական նպատակների իրագործման համար առաջարկվող միջոցառումների ծրագիրը:
Քննարկման ընթացքում փորձագետները նշեցին մարդածին գործոնների բացասական ազդեցությունը շրջակա միջավայրի վրա, որն էլ հանգեցնում է ջրի և հողի աղտոտման, կենսաբազմազանության կորստի, ինչպես նաև բնական պաշարների սպառմանը:
Մասնակիցներն իրենց հերթին ներկայացրին իրենց կարծիքներն ու առաջարկությունները նախագծի վերաբերյալ, որոնք, ըստ ծրագրի իրագործողների, հաշվի կառնվեն վերջնական նախագծի պատրաստման ընթացքում: Իսկ վերջնական նախագիծը ՀՀ կառավարման հաստատմանը ներկայացնելու նպատակով ՀՀ Բնապահպանության նախարարությանը կտրամադրվի ս. թ. հուլիսին:
