Մարիամ Մաթևոսյան
Գեղանուշ Քարամյանն իր չորս անչափահասների հետ ապրում է Տեղ գյուղում: Ամուսնալուծությունից հետո երեխաներին օգնում են մեծացնել նրա ծնողները: «Մամաս տնկարանում ամեն օր արեւի տակ հող փորելով մի երկու կապեկ ա աշխատում, բայց դրանով տուն պահել չի լինի»-ասում է բազմազավակ մայրը:Գեղանուշի ընտանիքը չի ընդգրկվել սոցիալական որևէ ծրագրում, որովհետև նրա անունով գրանցված էլեկտրական հաշվիչ չկա, այսինքն էլեկտրական հոսանք սպառող բաժանորդ չէ:
Նրա խոսքով՝ Սոցիալական ծառայության Գորիսի տարածքային գործակալությունը չի հրաժարվում ընտանեկան նպաստ վճարել. «Գորիսում ասում են, որ քեզ տրվում ա օրենքով, բայց փաստաթուղթ պեր, որ տու տուն ունես ու լույս ես վառում»,-ասում է Գեղանուշը:
Հայրական տան հասցեով նա չի կարող անապահովության նպաստ ստանալ, քանի որ մայրն ու հայրն աշխատում են, իսկ Գեղանուշի խոսքով, առանձին ապրելու համար համայնքում բոլոր տները բնակեցված են: Նա բազմիցս դիմել է համայնքային իշխանությանը, որը պատասխանել է, որ ազատ բնակարաններ չունեն: «Գյուղապետարանում ստից թղթեր են կիրում, քինում եմ Գորիս, դատարկ ձեռքով վերադառնում: Ութ տարի, ամիսը մոտ 50 հազար դրամ ստանալու հնարավորությունս կորցրել եմ»,- նեղսրտում է Գեղանուշը:
Տեղի համայնքի 2015 թվականի բյուջեով նախատեսված է 1 մլն 600 դրամ,, որից 400 հազարը տրամադրվում է առողջության խնդիրներ ունեցող բնակիչներին, մյուսը՝ հաշվարկվում է ըստ կարիքավորության: Համայնքի ղեկավար Սաղաթել Գալստյանի խոսքով սոցիալական օգնությունից տարեկան օգտվում է 40 ընտանիք: Տրամադրվող ցուցակում նշված չէ Գեղանուշ Քարամյանի անունը, չնայած տեղական իշխանությունը գումարների բաշխման ժամանակ առավելությունը տալիս է բազմազավակ ընտանիքներին՝ տրամադրելով մինչեւ 50 հազար դրամ:
Տեսանյութը՝ Անահիտ Բաղդասարյանի
