Անահիտ Բաղդասարյան
43 աշակերտ ունեցող դպրոցում ոչ լաբորատորիա կա, ոչ էլ անհրաժեշտ սարքավորումներ ու նյութեր: Քիմիայի և կենսաբանության դասաժամին որևէ փորձնական աշխատանք չի կատարվում: Հիմնականում տեսական գիտելիքների հիման վրա են անցնում դասերը: «Էս երեխաները չգիտեն միկրոսկոպի հետ աշխատելը որն է, որևէ փորձ չեն կարող կատարել: Ոչ մի գործնական աշխատանք չենք անում, վերացական խոսում ենք»,- նշում է քիմիայի և կենսաբանության ուսուցչուհի Սոնա Հակոբջանյանը: Ուսուցչուհին պատմում է, որ տարիներ առաջ քիմայի դասաժամին աշակերտներին տարել է մոտակա զինվորական հիվանդանոց, որպեսզի գոնե ծանոթանան սարքավորումներին ու միկրոսկոպով տեսնեն բջջի կառուցվածքը: «Ինչքան ուզում ես աշակերտին ասա, անիմաստ է, բայց երբ երեխան տեսնում է, սկսում է փորձեր կատարել, իր պատկերացումները փոխվում են, նրանք սկսում են հետաքրքրվել բնագիտական առարկաներով ու ավելի լավ սովորել»,- ավելացնում է քիմիայի ուսուցչուհին:
Պատկերը նույնն է նաև ֆիզիկայի դասաժամերին: Ֆիզիկայի ուսուցիչ Սուրեն Բլբուլյանը, ով նախկինում դպրոցի տնօրենն էր նշում է, որ դասերին միայն որոշ պարզունակ փորձեր է կարողանում կատարել: «Եղել է դեպք, որ գնացել եմ ուրիշ դպրոց, մի սարք մտցրել գրպանս ու դուրս եկել: Բա ինչ անենք. Էս էրերխեքն էլ պիտի մի գործնական աշխատանք կարողանան կատարել, թե չէ »,- խոստովանում է նա :
Աղիտուի տնօրեն Սուրեն Շահնազարյանը նշում է, որ բյուջեում այդքան գումար չկա, որ կարողանան տրամադրել ինչ որ լաբորատոր սարքավորում կամ որևէ նյութ ձեռք բերելու համար:
Դպրոցը կառուցվել է 2001թ. և ապահովվել է միայն աշակերտական սեղան, նստարաններով, իսկ մնացած ամբողջ գույքը, ուսուցիչների խոսքով, «ստեղից- ընդեղից բերված են»:
Դպրոցը նաև մարզադահլիճ չունի, իսկ սպորտային գույքից ունեցածը միայն երկու գնդակն է: Ֆիզկուլտուրայի ուսուցիչ Մարատ Կարապետյանը ասում է, որ տաք օրերին դասերն անցնում են դպրոցի բակում, իսկ աշնանը՝ միջոցառումների դահլիճում: Այստեղ ևս չկարողանալով ջեռուցում ապահովել, ձմռանը ֆիզկուլկուրայի դասին դասասենյակներում՝ շախմատ են խաղում: «Տիպային շենք են կառուցել, առանց մարզադահլիճի, չնայած համապատասխան տարածք ունենք, բայց միջոցներ չկան: Արդեն 25 տարի է, նույն խնդրի առջև կանգնած ենք»,- ասում է Մ. Կարապետյանը:
Դպրոցի գրադարանավարուհի Արմիդա Վարդազարյանի խոսքով էլ գրադարանն ապահովված չէ ծրագրային գրքերով, գրքի աղքատ ֆոնդ ունեն, վերջին տարիներին միայն ՀՀ Գրողների միությունն է իրենց խնդրանով որոշակի գրքեր հատկացրել:
