Մարիամ Մաթևոսյան
Թիվ 37/4 տեղամասում, որը գտնվում Գորիս քաղաքի 6-րդ հիմնական դպրոցի շենքում, ժամը 14:00-ի դրությամբ, 1745 ընտրողներից քվարկության է մասնակցել 442-ը: Այստեղ ընտրական գործընթացին հետևում են «Ասպարեզ» և «Իրավունքի Եվրոպա միավորում» Հկ-ների 1-ական դիտորդներ, վստահված անձիք: Վերջիններս հանձնաժողովի անդամներին «աչքով հասկացնելով» ժամանակ առ ժամանակ դուրս են հրավիրում քվարկության սենյակից:
Հանձնաժողովի 8 անդամներից մասնակցում է 7-ը: «ՕԵԿ» կուսակցության ներկայացուցիչ Միհրան Այվազյանը չի ներկայացել տեղամաս: «Միհրանն այժմ հանրապետությունից դուրս է գտնվում: Վերին Լարս ավտոճանապարհի փակ լինելու պատճառով չհասցրեց ներկայանալ»,-ասաց Մ. Այվազյանի հեռախոսահամարին պատասխանողը: «Իրավունքի Եվրոպա միավորման» ՀԿ-ի դիտորդի խոսքով՝ միջադեպեր չեն գրանցվել, միայն հանձնաժողովին տեղեկացրել է, որ մուտքի մոտ թեքահարթակ չլինելը դժվարացնում է հաշմանդամություն ունեցող ընտրողների տեղաշարժը: Խնդիրը լուծվել է փայտե հարմարանք տեղադրելուց հետո:
Ձյան, սառույցի պատճառով դժվարանցանելի է նաև տեղամաս տանող ճանապարհը: Հանձնաժողովի անդամները դժգոհ էին, որ քվարկության համար նախատեսված սենյակը լավ չի ջեռուցվում:
