Մարիամ Մաթևոսյան
Հայաստանի Տարածքային զարգացման հիմնադրամը(ՀՏԶՀ) «Սոցիալական ներդրումների և Տարածքային զարգացում» ծրագրի շրջանակներում, փետրվարի 11-ին Շինուհայր կենտրոնում կազմակերպել է տեղեկատվական սեմինար՝ Տաթև համայնքում միավորված բնակավայրերի ՏԻՄ-երի, նախաձեռնող խմբերի համար:
Հանդիպմանը ներկա ՀՀ տարածքային կառավարման և արտակարգ իրավիճակների նախարարության տեղական ինքնակառավարման վարչության պետ Աշոտ Գիլոյանը ողջունելով ներկաներին՝ նշեց, որ ծրագիրը հնարավորություն է ստեղծում խոշորացված համայնքների համար միասին մշակել Տաթև համայնքի զարգացման հեռանկարը:
ՀՀ կառավարության և ԱՄՆ Միջազգային զարգացման գործակալության կողմից ֆինանսավորվող ծրագիրը նպատակ ունի բարելավել համայնքային ենթակառուցվածքների աշխատանքները, աջակցել, որպեսզի տեղական ինքնակառավարման մարմիններն ավելի որակյալ ծառայություն մատուցեն, որի հիմքում ընկած է համայնքների համաչափ զարգացումը:
ՀՏԶՀ-ի ներկայացուցիչ Արամ Գրիգորյանը հանդիպման մասնակիցներին ներկայացրեց, մասնավորապես, Սոցիալական ներդրումների և Տարածքային զարգացման ծրագրի 2-րդ բաղադրիչը, այն է՝ աջակցություն միջհամայնքային սոցիալական և տնտեսական զարգացման նախաձեռնություններին: «ՀՏԶՀ-ն և իր գործընկեր կազմակերպությունները կաջակցեն այն ծրագրերին, որոնք ոչ թե կապահովեն մեկ համայնքի սոցիալ-տնտեսական զարգացում, այլև մի խումբ համայնքների կամ բնակավայրերի համաչափ զարգացում»,-նշում է Ա. Գրիգորյանը:
Նախնական տեղեկատվությամբ՝ ծրագրի շրջանակներում կշրջանառվի 1 մլն դոլար:Նախաձեռնող խմբերը ծանոթացան ծրագերի առաջարկների որոշ կարևոր հատկանիշերի հետ, գործնական աշխատանքի միջոցով ներկայացրեցին նախնական գաղափարներ, որոնց թվում էին գյուղատնտեսական տեխնիկայի ձեռքբերում, իրացման շուկայի բացում, նոր աշխատատեղերի ստեղծում և այլն:
Ծրագրի մշակմանն իր աջակցությունը կցուցաբերեն Սյունիքի մարզպետարանի Տեղական ինքնակառավարման և հանրապետական գործադիր մարմինների հարցերով վարչության մասնագետները:
