Սուսաննա Շահնազարյան
Սյունիքի մարզի Տաթևի համայնքի ղեկավարի և ավագանու ընտրությունների Հալիձորի ընտրական տեղամասային հանձնաժողովի նախագահ Շուշանիկ Գաբրիելյանն աննախադեպ է համարում ընտրողների ակտիվությունը Տաթևի համայնքում այսօր անցկացվող ՏԻՄ ընտրություններին. Կեսօրին արդեն քվեարկել էր 444 ընտրողների կեսից ավելին:
«Եվ համայնքի ղեկավարի և ավագանու թեկնածուները օրենքով նախատեսված թվով վստահված անձինք ունեն: Նախկինում ավագանու անդամների թեկնածուները ուշադրություն չէին դարձնում, այս անգամ շատ հետևողական իրենց ներկայացուցիչների մասնակցությունն ախահովել են»,-ասում է հանձնաժողովի նախագահը:
Համայնքի ղեկավարի թեկնածու Վարշամ Բագրատյանի վստահված անձ Ժաննա Բարսեղյանը նշում է, որ ընտրությունները բնականոն հունով են ընթանում, բայց մտահոգություն է հայտնում, որ Հալիձորի նախկին համայնքի ղեկավարը ներկայացել է որպես հանրապետական կուսակցության կողմից առաջադրված թեկնածուի վստահված անձ:
Ժաննա Բարսեղյանը նաև նշում է, որ նախապես իրենք ճշտել են Հալիձորի համայնքի ընտրողների ցուցակը և մոտավոր հաշվարկներով 100 մարդ գտնվում է արտերկրում:
