Մարիամ Մաթևոսյան
Տաթև համայնքի ավագանու թեկանածու, Շինուհայր համայնքից ինքնառաջադրված Գեսիկ Մաթևոսյանը, չնայած ժամը 14-ից գտնվում էր թիվ 37/1 ընտրատեղամասում, այնուամենայնիվ, չէր շտապում ընտրական պարտքը կատարել: Փորձում էր հանձնաժողովի անդամների աշխատանքին միանալ, կողմնորոշում էր համագյուղացիներին, որպեսզի չշփոթեն համայնքի ղեկավարի և ավագանու քվաթերթիկի գույները: Միայն հանձնաժողովի անդամներից մեկի շտապեցնելուց հետո մտավ քվեախցիկ. վստահված անձանցից մեկը կատակեց. «Չմոռանաս քո օգտին քվարկել»:
«Այ հիմա ցավազրկվեցի»,-քվեարկելուց հետո ասաց նա ու դուրս եկավ տեղամասից:
Շինուհայրում ընտրությունների մասնակցության բարձր ցուցանիշ է նկատվում: Թիվ 37/1 տեղամասում, ժամը 18:00-ի դրությամբ, 1763 ընտրողից ընտրության է մասնակցել 1020-ը:
Խոսելով ընտրողների ակտիվության մասին` Սյունիքի մարզպետարանի Տեղական ինքնակառավարման և հանրապետական գործադիր մարմինների հարցերով վարչության պետ Սեյրան Ավետիսյանը նշում է, որ ՏԻՄ ընտրություններում միշտ էլ ընտրողների ակտիվ մասնակցություն է նկատվում, հատկապես, եթե այն զուգորդվում է ավագանու ընտրությունների հետ, քանի որ բոլորը պայաքրում են իրենց ձայների համար:
Ընտրապայքարը թեժ է և’ տեղամասի ներսում, և’ դրսում: Նկատվում են կուտակումներ: Ընտրողներից մեկը տեղամաս էր ներկայացել 2 անձնագրով ու պատրաստվում էր քվարկել նաև ուրիշի փոխարեն, բայց վստահված անձանցից մեկը «հուշեց», որ «բան դուրս չի գա»: Վերջինս նաև երբեմն օգնում էր հանձնաժողովի անդամներին՝ քվաթերթիկ էր բաժանում:
Շինուհայրցի Նարեկը, քվարկելուց հետո ներկա համագյուղացիներին ասաց, որ վերջին ընտրություններն են, որին մասնակցում է, որոշել է մեկնել արտագնա աշխատանքի: Զրույցն ընդհատեց ընկերը. «Հենց խոշորացվեց, ես էլ եմ խոխորցս վերցնելու ու հեռանալու գյուղից»:
Զոյա Օհանջանյանը ընտրության էր եկել առանց որևէ ակնկալիքի. «Ընդամենն իմ պարտականություն եմ կատարում, որևէ ակնկալիք չունեմ»:
Ընտրատեղամասում ամենաակտիվ դերում հանձնաժողովի քարտուղարն էր` Գարիկ Միրզաթունյանը, ով հրաժարվեց ասել, թե ովքեր են որպես վստահված անձինք գրանցվել. «Հո չեմ նստելու քեզ հատ-հատ ասեմ»:
Քիչ հետո սակայն, հանձնաժողովի քարտուղարը տևական ժամանակ գտնվում էր ընտրատաեղամասինց 200մետր հեռու` բանուկ ճանապարհին և մի քանի մեքենաների խցանումը շրջանցելով, նստեց մեքենան և հեռացավ ընտրատեղամասից:
