Մարիամ Մաթևոսյան
Առաջիկա տարիների ընթացքում, ամենայն հավանականությամբ, Գորիսում կմաքրվի Վարարակն գետը, կկառուցվի կոլեկտոր, կհամարակալվեն փողոցներն ու կստեղծվեն տեղեկատվության տարածման միջոցներ: Որոշումը կայացվել է ՏԻՄ-բնակիչ ձևաչափով հանդիպման ժամանակ:
«Ալվարիում» դասընթացային և խորհրդատվական կենտրոնը, Գերմանական զարգացման գործակալության աջակցությամբ, փետրվարի 16-ին Գորիսի քաղաքապետարանի նիստերի դահլիճում կազմակերպել է հանդիպում-քննարկում՝ ՏԻՄ-երի, համայնքային ենթակառուցվածքների, քաղաքացիական հասարակության ներկայացուցիչների մասնակցությամբ:
Հանդիպման-քննարկման նպատակն էր քարտեզագրել Գորիս քաղաքի համայնքային խնդիրները, որոշել դրանց առաջնահերթությունը:
Վեր հանված խնդիրների ցանկում նշվեցին աշխատատեղերի բացակայությունը, աղբահանությունը, հանրային տրանսպորտի ոչ կանոնավոր աշխատանքը, ճանապարհների ասֆալտապատումը, վթարային շենքերի պահպանությունը, մանկապարտեզների շենքային պայմանները, մշակութային, սպորտային օջախների բարեկարգումն ու ջեռուցումը, տեղեկատվության տարածման միջոցների բացակայությունը, Վարարակն գետի մաքրումն ու քաղաքի գլխավոր կոլեկտորի կառուցումը և այլն:
Գորիսի քաղաքապետ Վաչագան Ադունցը ներկայացրեց, թե համայնքային խնդիրների լուծման ուղղությամբ տեղական իշխանությունն առաջիկայում ինչ ծրագրեր է նախատեսում, ինչպիսի ներդրումներ են ակնկալում:
