Անահիտ Բաղդասարյան
Սյունիքի մարզի Խնձորեսկ համայնքում համայնքի ղեկավարի ընտրություններ են: Ժամը 15:00-ի դրությամբ 1470 ընտրողներից քվեարկությանը մասնակցել է ընդամենը 300-ը: Համայնքի ղեկավարի թեկնածուները երկուսն են` գործող գյուղապետ Սերյոժա Հայրապետյանը և համայնքի ղեկավարի օգնական Էդիկ Մինասյանը:
Ընտրողների պասիվությունը թիվ 37/1 ընտրատեղամասային ընտրական հանձնաժողովի նախագահ Արծրուն Միրզաթունյանը, ով հիմնականում ելումուտ էր անում տեղամսում, բացատրում է «հետպատերազմական իրավիճակով»:
Ընտրությունների մասին անտարբերությամբ են խոսում նաև տեղամասի մոտ խմբված մարդիկ, ասելով, թե իրենց ակնկալիքները այս ընտրություններից, մեկն է` «մեր երկրին խաղաղություն լինի, ուրիշ ակնկալիք չունենք»:
Սերյոժա Հայրապետյանը, ով 17 տարի է, ինչ համայնքի ղեկավարն է, ակտիվ մասնակցություն է ունեցել Արցախյան պատերազմում: Այժմ էլ, ըստ նրա իր մտահոգությունը կապված է ոչ թե ընտրությունների արդյունքի, այլ` սահմանի իրավիճակի հետ: Ասում է, որ դեռ չի քվեարկել, քանի որ կազմակերպչական աշխատանքներ է կատարում. կամավորներ պետք է ուղարկի դիրքեր: Նրա խոսքով՝ելնելով երկրում ստեղծված իրավիճակից, համայնքում քարոզչություն չի իրականացվել:
«Լարված եմ, ճիշտ է, բայց ոչ թե ընտրության պատճառով, այլ այն վիճակից, որ պահպանվում է մեր ռազմաճակատում, քանի որ Խնձորեսկից շատ երիտասարդներ այս պահին դիրքերում են»,- նշում է Ս. Հայրապետյանը:
«Իրավիճակը, որ սենց ա, էլ կարևոր չի, թե ով կընտրվի համայնքի ղեկավար. կարևորը մեր երկրի անվտանգություն ա»,- ասում է մյուս թեկնածուն:
Ընտրատեղամասից մի քիչ այն կողմ մի խումբ մարդիկ էին հավաքված. առաջին հայացքից թվում էր, թե թեկնածուներին սատարողներն են, սակայն հետո պարզվեց, որ խնձորեսկցի կամավորներն են, ովքեր հիմնականում նախկին ազատամարտիկներ են ու պատրաստվում են գնալ առաջնագիծ՝ փոխարինելու իրենց համագյուղացիներին:
Կամավորների մեջ էր նաև Երևանից ժամանած Յոլչյան Տիգրանը , ով 1996-98 թթ.-ին ծառայել է Խնձորեսկի զորամասում: «Դիմել էի Երևանի վայնկոմիմատին, որ ինձ էլ ուղարկեն դիրքեր, սակայն հույս չտվեցին, որ շուտ կստացվի իմ գնալը, ես էլ չդիմացա, եկա Գորիսի վայենկոմին դիմեցի»,- ասում է Տիգրանը:
«Ինչ էլ ուզում ա լինի, հաստատ մենք հաղթող ենք». այսպիսի տրամադրվածությամբ են մեր կամավորները պատրաստվում գնալ առաջնագիծ:
Նախկին ազատամարտիկ Խնձորեսկի ջոկատից Արթուր Քյարունցի խոսքով «ընտրություններն իրենց հունով կգնան»,- մտածում է, որ գործող համայնքի ղեկավարը կընտրվի, կշարունակի իր գործը, «բայց մենք պիտի մեր հողը պահենք: Մենք մեր ջահելների կողքին պիտի լինենք, մենք էլի կյանք տեսած ենք»:
