Անի Ասատրյան
Մայիսի 9-ը հայոց հաղթական ապագայի խորհրդանիշն է: Այս օրը հայ ժողովրդի համար եռատոն է` Մեծ հայրենականում հաղթանակի, Շուշիի ազատագրման և Արցախի պաշտպանության բանակի ստեղծման օրը:
Հայրենական պատերազմի ռազմաճակատում մղվող պայքարում իրենց մասնակցությունն են ունեցել նաև հալիձորցիները, նրանցից ողջ մնացած միակ տարեգիր-վկան Քերոբ Բախշյանն է, ով կռվել է Հունգարիայում:
Շուշիի ազատագրման գործին մասնակցելու նպատակով Հալիձորում ստեղծվեց կամավորական ջոկատ` Միշա Գրիգորյանի գլխավորությամբ: Միշան, լինելով երեք երեխաների հայր, իր կյանքը զոհեց հանուն հայրենիքի: Հրամանատարի հետ կռվի դաշտում ընկավ նաև 22-ամյա Վարդան Առուստամյանը` այդպես էլ չտեսնելով իր միակ դստերը: Շատերը հետ դարձան՝ վիրավոր, առողջական լուրջ խնդիրներով: Այսօր էլ կամավորական ջոկատի տղաներից Գարեն Կարապետյանը և Լևոն Ստեփանյանը գտնվում են առաջնագծում:
Այսօր Հալիձորում կազմակերպվել էր Շուշիի ազատագրմանը նվիրված տոնական միջոցառում` հաղթանակի ուղի կերտած հայորդիների զավակների, դպրոցակաների ու մանկապարտեզի սաների մասնակցությամբ, որն ուղեկցվեց հաղթական երգ ու պարով: Իսկ համայնքաբնակները ծաղիկներ դրեցին հերոսների հիշատակն անմահացնող հուշակոթողին:
