Իզա Ասծատրյան
Գերմանիայի միջազգային համագործակցության ընկերությունը(GIZ), Տարածքային կառավարման և զարգացման նախարարության համագործակցությամբ, մայիսի 11-12-ին Հալիձոր բնակավայրում կազմակերպել էր տեղեկատվական սեմինար` «Մասնակցային ախտորոշման և պլանավորման գործիքներ» թեմայով:
«Regional Development Foundation» կազմակերպության ղեկավար ու գլխավոր փորձագետ Վարազդատ Կարապետյանն ու GIZ-ի խորհրդական Արմեն Քեշիշյանը ողջունելով ներկաներին՝ ներկայացրեցին տեղեկատվական սեմինարի նպատակները, խնդիրները և ակնկալվող արդյունքները:Հանդիպման նպատակն էր Տաթև համայնքում միավորված բնակավայրերի ՏԻՄ-երի, նախաձեռնող խմբերի, համայնքի բնակչության հետ միասին, երկխոսության, համագործակցության միջոցով վերլուծել Տաթև համայնքի զարգացմանը նպաստող ռեսուրսները: Քննարկումների արդյունքում ռեսուրսների մեջ նշվեցին «Տաթևեր» ճոպանուղին՝ իր «Տաթևի Վերածնունդ» զարգացման ծրագրով, երիտասարդների ներուժը, ֆերմերային տնտեսությունները, զբոսաշրջության զարգացումը, ՏԻՄ-երն՝ իր ենթակառուցվածքներով, դպրոցներն ու առողջության առաջնային պահպանման կենտրոնները:
Տաթև համայնքի աշխատակազմի ղեկավար Մարատ Գերասիմյանը, կարևորելով կարողությունների զարգացման ուղղված դասընթացները, նշում է, որ քննարկումներում բնակիչների կողմից հնչեցված առաջարկությունները տեղ կգտնեն առաջիկայում կազմվող Տաթև համայնքի քառամյա զարգացման ծրագրում:
Հանդիպմանը ներկա էին Սյունիքի մարզպետարանի Տեղական ինքնակառավարման և հանրապետական գործադիր մարմինների հարցերով վարչության մասնագետներ, Տաթև համայնքի աշխատակազմի ներկայացուցիչներ, ՏԻՄ մարմիններ:
