Իզա Ասծատրյան
«Ռազմավարական զարգացման գործակալություն» հասարակական կազմակերպությունը ներկայումս իրականացնում է «Անասնապահության զարգացում Հայաստանի հարավում» ծրագիր, որի նպատակն է նպաստել Սյունիքի և Վայոց Ձորի մարզերում անասնապահության ոլորտում ներգրավված կին և տղամարդ ֆերմերների եկամուտների աճին և տնտեսական հնարավորությունների ընդլայնմանը: Ծրագիրն ընդգրկում է Սյունիքի և Վայոց Ձորի մարզերի 100 գյուղական համայնքներ և ֆինանսավորվում է Շվեյցարիայի Զարգացման և Համագործակցության Գործակալության (ՇԶՀԳ) կողմից:
Անասնապահության զարգացում Հայաստանի հարավում» ծրագրի շրջանակներում անցած շաբաթ Սյունիքի անասնաշուկայում Հալիձորի միջնակարգ դպրոցի աշակերտների համար կազմակերպվել էր դասընթաց՝ գյուղատնտեսության կառավարման և անասնապահության վարման ժամանակակից մեթոդների վերաբերյալ:
Դասընթացի նպատակն է Սյունիքի մարզի գյուղական համայնքների երիտասարդների մոտ սեր արթնացնել գյուղատնտեսությամբ զբաղվելու նկատմամբ, զարգացնել երեխաների գիտելիքները և ծանոթացնել անասնապահության վարման արդի մեթոդներին և միջոցներին:
«Դասընթացի կրթական նյութի մատուցման ճանապարհով նպատակ ենք հետապնդել բարձրացնել անասնապահության ճիշտ վարման հիմնական գիտելիքները և կոտրել սեփական փորձի վրա հիմնված և նախկինից փոխանցված կարծրատիպային մոտեցումները»,- gorispress.am-ի հետ զրույցում ասաց ծրագրի դասընթացավար, Ռազմավարական զարգացման գործակալության անասնաբույժ-մասնագետ Միքայել Հայկունին:
Մ. Հայկունին նշեց, որ համայնքների ընտրության ժամանակ հաշվի են առել համայնքի՝ անասնապահությամբ զբաղվելու հնարավորությունները և հետաքրքրության գործոնը:
