Շուշան Օհանյան
Տաթև համայնքի Շինուհայր կենտրոնում այսօր տեղի ունեցած հանդիպման նպատակն էր համայնքին ներկայացնել «Տաթև համայնքի ներհամայնքային ճանապարհների սպասարկման, կանոնավոր աղբահանության և գյուղտեխնիկայի վերազինում» ծրագիրը, որի ընդհանուր արժեքը կազմում է 198 մլն 467 հազար դրամ, որի մոտ 192 մլն դրամը տրամադրում է ԱՄՆ ՄԶԳ-ը ՝ դրամաշնորհի տեսքով, մնացածը կլինի համաներդրում՝ համայնքի կողմից:
ԱՄՆ ՄԶԳ-ի կողմից տրամադրված դրամաշնորհի շրջանակներում ձևավորվել է նախաձեռնող խումբ, որի կազմում ընդգրկված են ներկայացուցիչներ Տաթև համայնքի բոլոր բնակավայրերից: Նախաձեռնող խումբն ամբողջ համայնքում իրականացրել է հիմնախնդիրների ուսումնասիրություն, քարտեզագրում, վերլուծություն և դրա հիման վրա հայտ ներկայացրել ծրագիրն իրականացնող կազմակերպությանը՝ Հայաստանի տարածքային զարգացման հիմնադրամին:
Վերջինիս ներկայացուցիչ Տաթև Եղիազարյանը հանդիպման մասնակիցներին ներկայացրեց հիմնադրամի ստեղծման պատմությունը, առաքելությունը, ասելով, որ «Հայաստանի տարածքային զարգացման հիմնադրամը հիմնադրվել է Սոցներդրումների հիմնադրամի վերակազմավորման հիմքի վրա` «2014-2025թթ. Հայաստանի հեռանկարային զարգացման ծրագրի» տարածաշրջանային զարգացման քաղաքականության շրջանակներում: Այս տարիների ընթացքում իրականացվել է 900-ից ավելի ծրագիր, որոնք հիմնականում ուղղված էին սոցիալական ենթակառուցվածքների վերանորոգմանը, կառուցմանը: Ընթացիկ ծրագրերի գործընկերները պիլոտային ծրագրով խոշորացված 14 համայնքներն են:
Տաթև համայնքի աշխատակազմի ղեկավար Մարատ Գերասիմյանը շեշտեց, որ միջազգային մի շարք կազմակերպություններ, որպես ՀՀ վարչատարածքային բարեփոխումների պիլոտային փուլում ձևավորված համայնք, հետաքրքրված են Տաթևով, և արդեն կան ներդրումների կոնկրետ հասցեներ:
«Տաթև համայնքի ներհամայնքային ճանապարհների սպասարկման, կանոնավոր աղբահանության և գյուղտեխնիկայի վերազինում» ծրագրով նախատեսվում է համայնքի ներհամայնքային ճանապարհները սպասարկելու նպատակով ձեռք բերել 3 միավոր տեխինկա /90 մլն 640 հազար դրամ/, կանոնավոր աղբահանություն իրականացնելու նպատակով ձեռք բերել մեկ աղբատար ավտոմեքենա և 170 հատ աղբաման /30 մլն 750 հազար դրամ/, 2 հատ հացահատիկ հնձող կոմբայն /64 մլն դրամ/, ստեղծել ՀՈԱԿ, որին կից կկառուցվի ավտոկայանատեղի Շինուհայր բնակավայրում /13 մլն 77 հաար դրամ/:
Ծրագրի ներկայացումից հետո բնակիչները հնարավորություն ունեցան ծրագրի հետ կապված հարցեր հնչեցնել, տեղեկանալ նախագծի իրականացման հետ կապված գործողություններին:
