Շուշան Օհանյան
Այսօր՝ սեպտեմբերի 18-ին, Արագածոտնի, Արարատի, Արմավիրի, Սյունիքի և Տավուշի մարզերի թվով 317 համայնքներում տեղի են ունենում տեղական ինքնակառավարման մարմինների ընտրություններ:
Տաթևի ենթաշրջանի գյուղերի /Քաշունի, Տանձատափ, Տաթև, Հալիձոր, Շինուհայր, Խոտ, Սվարանց, Հարժիս/ միավորումից հետո Սյունիքի մարզի Գորիսի տարածաշրջանում կձևավորվի համայնքների խոշորացման ևս երկու փունջ` Գորիս և Տեղ:
Ակները մեկն է այն 10 համայնքներից, որոնք խոշորացման արդյունքում կղեկավարվեն մեկ կենտրոնից՝ Գորիսից:Խոշորացված Գորիս համայնքի ղեկավարի թեկնածություն է առաջադրել մեկ անձ՝ համայնքի նախկին ղեկավար Վաչագան Ադունցը /ՀՀԿ/, իսկ ավագանու 15 տեղի համար պայքարում են 25 թեկնածու: Ակներ համայնքից ավագանու թեկնածություն են առաջադրել երկու հոգի՝ Արտեմ Մինասյանը(անկուսակցական) և Կարեն Առաքելյան (ԲՀԿ):
Ակների թիվ 37/11 ընտրատեղամասում, որը տեղակայված է դպրոցի շենքում, ՏԻՄ ընտրություններին ժամը 15:20-ի դրությամբ մասնակցել են ընտրելու իրավունք ունեցող 801 քաղաքացիներից 304-ը:
Ըստ հանձնաժողովի նախագահ Ղուկաս Հարությունյանի, ընտրություններն անցնում են հանգիստ։ Դիտորդ Հելեն Փարամազյանը, ով ներկայացնում է «Թրանսփարենսի ինթերնեշնլ հակակոռուպցիոն կենտրոնը», ևս հաստատեց, որ մինչ այժմ որևէ միջադեպ չի եղել: Այս ընտարտեղամասում դիտորդություն է իրականացնում նաև «Իրավունքի Եվրոպա միավորում» ՀԿ:
«Համայնքի բնակիչները բավարար չափով ինֆորմացված են խոշորացման գործընթացիկ և հիմնականուն դրական վերաբերմունք ունեն, դեմ չեն քաղաքի կարգավիճակ ստանալուն»-gorispress.am-ի հետ ունեցած զրույցում նշեց Ակների նախկին համայնքապետ Սպարտակ Մինասյանը, ով տեղմասում էր որպես Վաչագան Ադունցի վստահված անձ:
Ի տարբերություն նախկին համայնքապետի պնդման, ընտրատեղամաս եկող բնակիչներից շատերը պնդում էին, որ բավարար ինֆորմացիա չունեն, իրենց համայնքի հետագա ճակատագիրը չեն պատկերացնում:
«Եթե մեր սոցիալական վիճակը կբարելավվի, կնվազի արտագաղթը, ապա թող խոշորացնեն»,-ասում է ընտրության եկած թոշակառու կինը:
