Անահիտ Բաղդասարյան
Չնայած նախկին Կոռնիձոր համայնքը 3 ավագանու անդամ ունի, սակայն բնակիչները էլի թերահավատորեն են վերաբերում, որ որոշումների կայացման գործընթացում, իրենց գյուղի կարիքները հաշվի կառնվեն: «Մեր համայնքից 3 –ն ա , Արավուսից ՝ 1-ը, իսկ Տեղից՝ 4-ը. ձայնային մեծամասնություն իրանցն ա լինելու, որոշումն էլ ընդունվելու ա հօգուտ Տեղի»,- պատճառաբանում է Արմո Պետրոսյանը, ով դեմ է խոշորացման գործընթացին:
«Մի մարդը հունց կարա մի քանի համայնք ղեկավարի. իրան էդքան ժամանակ շտեղան, որ մեր բոլորիս հարցերին կարողանա պատասխանել»,-ավելացնում է նա: Ընթացքում իրենք դեմ լինելու պատճառաբանություններն են բերում համագյուղացիները, ովքեր նշում էին իրենց համայնքի նախկին ղեկավարի արագ արձագանքը իրենց բարձրացրած հարցերին:
«Մեզ փետրվարին պարարտանյութ ա պետք, բայց հիմա բերելու են մայիսին»:Բնակիչներից շատերն անտեղյակ են համայնքների խոշորացման գործընթացից ու միայն մասնակցում են ընտրություններին՝ որպես քաղաքացիական պարտք: «Մենք դեռ չենք հասկանում էս խոշորացման նպատակը. ես միայն գիտեմ, որ մի քանի տարի հետո էս էլ կփոխվի ու սաղ գյուղերը կմիանան Գորիսին: Ռայկոմի քարտուղարն էլ կնստի Գորիսում. մի խոսքով, կդառնա նախկին սովետը՝ անունը փոխված»,- իր կարծիքով մեզ հետ կիսվում է Խաչատրյան Կարենը:
Ժիրայր Ավետիսյանն այլևս ոչ մի գործընթացի չի հավատում՝ նշելով , որ բնակիչները երթակա մարդիկ են, ում կարծիքը ոչ մեկ հաշվի չի առնում. «ա՜յ, եթե պատերազմ սկսվի, մենք կլինենք երկրի տերը, խաղաղ պայմաններում ընդամենը ենթակա ենք. ինչ ասում են, անում ենք»,- մեզ հետ զրույցում ասում է Ժիրայրը:
Բնակչության մեծամասնությունն անհանգստանում է մի փաստաթուղթ ստանալու համար այլ բնակավայր գնալու դժվարությունները: «Մի թղթի, ստորագրության համար պիտի հասնես Տեղ գյուղ՝ հատկապես եթե համայնքում հանրային տրանսպորտ չի գործում»,- բողոքում է Անուշ Ստեփանյանը:
Սյունիքի մարզի Տեղ համայնքի 37/3 ընտրատեղամասում՝ նախկին Կոռնիձոր համայնքում, 783 ընտրողներից ընտրությանը մասնակցել է 627-ը:
