Սուսաննա Շահնազարյան
Դեկտեմբերի 5-ին կայացած Գորիսի ավագանու որոշմամբ «Գորիս համայնքի բարեկարգում և բնակարանային տնտեսություն» համայնքային ոչ առևտրային կազմակերպությանը Գորիս համայնքի 2016 թվականի բյուջեի պահուստային ֆոնդից հատկացվել է 13 միլիոն 2 հարյուր հազար դրամ՝ «լուսավորության, աղբահանության, շրջակա միջավայրի պահպանության և բնակարանային տնտեսության, ինչպես նաև հարկային պարտավորությունների կատարման համար»:
Ընկերության տնօրեն Վահագն Միքայելյանի խոսքով տրամադրված միջոցները հիմնականում կուղղվեն արդեն իսկ կատարված աշխատանքներին: Այն հարցին, թե արդյոք ընկերությունը բավարար միջոցներ ունի խստաշունչ ձմռան ամիսներին նաև քաղաքի ձնամաքրման, ձնահեռացման աշխատանքներն իրականացնելու համար, Վահագն Միքայելյանը նշում է, որ այդ նպատակի համար նախապես կուտակվել է 270 խորանարդ մետր ավազ, խնդիրը հիմնականում կապված է տեխնիկայի, մասնավորապես, տրակտորի ձեռքբերման հետ:«Դա իհարկե, չի ենթադրում, որ համայնքում, մասնավորապես, Գորիս քաղաքում ձնամաքրման, ձնահեռացման աշխատանքներ չեն իրականացվում: Դեռևս աշնանը նորոգվել է Գորիս ՏՆՏ-ի հաշվեկշռում գտնվող տեխնիկան, սակայն տրակտոր ձեռք բերելու համար մոտ 50 միլիոն դրամ է անհրաժեշտ, որը բնականաբար, հնարավոր չէ համայնքային բյուջեով գնել, ուստի անհրաժեշտության դեպքում այն վարձակալվում է տարբեր կազմակերպություններից»,- www.gorispress.am-ին ասաց ընկերության տնօրենը: Նա նաև նշում է, որ ընկերությունը չունի համապատասխան ծածկով տարածք, որտեղ կարող է պահվել կուտակված ավազը, ուստի բացօթյա պայմաններում, երբեմն ջերմաստիճանի կտրուկ իջոցման պատճառով այն սառչում է և լրացուցիչ դժվարություններ ստեղծում տեղափոխման համար:
Մեզ նաև հետաքրքրում է, թե ինչպես է բացատրում վերջին շրջանում բնակչության դժգոհությունը կապված քաղաքի մի շարք փողոցներում վտանգավոր մերկասառույցի առկայության հետ, որը վտանգում է ոչ միայն մեքենաների, այլև հետիոտնի երթևեկը: Վահագն Միքայելյանի խոսքով, մասնավորապես, սոցցանցերում հնչող մեկնաբանությունները երբեմն ծայրահեղացված են և, ըստ նրա, «Բարեկարգում և բնակարանային տնտեսության» հիմնադրումից սկսած, (այն ստեղծվել է նախկին «Գորիս ՏՆՏ» ՓԲԸ-ի լուծարումից հետո հեղ. Ս. Շ), տեխնիկական, մարդկային սուղ միջոցներով, այնուամենայնիվ, ձգտում են կանոնավոր իրականացնել քաղաքի թե աղբահանության և թե ձնահեռացման աշխատանքները:
Թե որքանով էր նպատակահարմար և ինչ նպատակ էր հետապնդում նույն գործառույթներն իրականացնող մի ընկերության լուծարումը և նորի հիմնադրումը և իրականում ինչ խնդիրներ ունի կազմակերպությունը բացի աղբահանությունից, ձնմամաքրումից, նաև լուսավորության, շրջակա միջավայրի պահպանության և բնակարանային տնտեսության ոլորտում ծառայություն մատուցելու համար, այլ քննարկման թեմա է, սակայն փաստ է, որ ի սկզբանե ընկերության պարտականությունների իրականացման տարածքը ենթադրում էր միայն Գորիս քաղաքը, իսկ համայնքների խոշորացման արդյունքում բազմաբնակավայր Գորիս համայնքի ձևավորման արդյունքում, ըստ էության, «Գորիս համայնքի բարեկարգում և բնակարանային տնտեսություն համայնքային ոչ առևտրային կազմակերպությունը» պարտավոր է համանաման ծառայություններ մատուցել ևս 9 բնակավայրում: Եվ դա է, պատճառը, որ ըստ տնօրենի, արդեն իսկ օգտագործվել է կուտակված ավազի 60 տոկոսից ավելին, քանի որ ձնամաքրման աշխատանքներ մինչև այժմ իրականացվել են նաև Վերիշեն, Քարահունջ, Ակներ բնակավայրերում:
Ձմեռը կարծես թե դեռ նոր է իր իրավունքների մեջ մտնում, և դժվար է ենթադրել ինչ կարելի է սպասել առաջիկա ամիսներին: Ակնայտ է միայն, որ սուղ միջոցներով, անհրաժեշտ տեխնիկայի բացակայության պայմաններում բազմաբնակավայր համայնքում բավարար ծառայություն մատուցել հնարավոր չէ:
