Մանե Հարությունյան
Գորիսի թիվ 6 դպրոց
Իմ կողքին ապրող մարդիկ շատ տարբեր, ժամանակին, գուցե, բնորոշ անուններ են կրում` Ժենյա, Մարուսյա, Բոխչագյուլից մինչ Կարինե, Նարինե, Մարինե, մինչ Լիլի, Ալեքս ու Մաքս:
Իսկ այսօ՞ր: Ի՞նչ անուններն են ժամանակակից համարվում, ի՞նչ անուններ են տրվում 21-րդ դարի նորածիններին, ի՞նչ խնդիրներ կան…
Այս հարցերի պատասխանները փնտրելու համար դիմեցի ՔԿԱԳ Գորիսի տարածքային բաժնի առաջատար մասնագետ Արմինե Հայրապետյանին:
-Ի՞նչ անուններով եք առավել շատ ծննդյան վկայականներ լրացնում:
-Միլենա, Ալեն, Արամե, Էլեն, Ալեքս, Արեն, Լիա, Գարիկ, Նարեկ, Նարե, Արթուր, Ավետ, վերջին սերիալներից` Կատրին, Էվա…
-Լինո՞ւմ են դեպքեր, երբ այնպիսի անուններ են ուզում գրացել, որ դուք չեք կարողանում անտարբեր լինել, ստիպված եք լինում միջամտել:
-Երբեմն խղճում ես այն չճանաչածդ երեխային, ով պիտի ողջ կյանքում կրի մեծահասակների ցանկությամբ ընտրված որոշ անուններ: Նման անբարեհունչ, տարօրինակ հապավումների արդյունք անունների դեպքում, եթե անգամ այն երջանկահիշատակ պապիկի անուն է (օրինակ` Լենդրոշ-լենինյան դրոշ` երևի), փորձում ենք մեր խորհուրդը տալ, ասել, որ երեխան մի ամբողջ կյանք իր անվան հետ կապված անհարմարություններ կարող է ունենալ: Այսօրվա ո՞ր երիտասարդ օրիորդն է ուրախ, եթե կրում է օրինակ, Հազարվարդ անունը:
Իսկապես, արժե հիշել` անունը ողջ կյանքի համար է: Իհարկե, վերջին կարծիքի իրավունքը իրենցն է:
-Անվան ընտրության հարցում, ըստ Ձեզ, հայ ընտանիքներում ու՞մ դերակատարությունն է զգալի, որոշիչ:
-Հիմնականում ամուսնու, կեսուր-կեսրայրի, մի քիչ էլ` երիտասարդ ծնողների:
-Քանի՞ ծնունդ եք գրանցել անցած տարում և ի՞նչպիսի միտումներ կան:
-2012-ին գրանցել ենք 508 ծնունդ, ընթացիկ տարում` 130: Մի տխուր միտում կա` հավասարվում են ծնվածների ու մահացածների թվերը:
-Իսկ ամենաուրախալի՞ն:
-Մոնթե անունով ծնունդ ենք գրանցել:
