Շուշան Օհանյան
Ինչպես արդեն նշել ենք, Ապրիլի 2-ին կայանալիք ՀՀ խորհրդարանական ընտրությունների քարոզարշավի շրջանակներում Գորիսի մամուլի ակումբը թիվ 12 ընտրական տարածքի տարածքային ցուցակում ընդգրկված թեկնածուներին առաջարկել էր կազմակերպության տեղեկատվական հարթակների միջոցով իրենց դիրքորոշումը ներկայացնել տեղական խնդիրներին առնչվող մի շարք հարցերի շուրջ:
Առաջինն արձագանքել է «Օհանյան-Րաֆֆի-Օսկանյան» դաշինքի կողմից տարածքային թեկնածու առաջադրված Մատվեյ Ղազարյանը:
«Մարդիկ չեն հավատում ընտրությունների ինստիտուտին և վստահ են, որ ընտրական գործընթացը Հայաստանում նախօրոք կանխորոշված ավարտ է ունենում»,-gorispress.am-ի հետ զրույցում նշեց «Օհանյան-Րաֆֆի-Օսկանյան» դաշինքի կողմից թիվ 12 ընտրատարածքի պատգամավորության թեկնածու առաջադրված Մատվեյ Ղազարյանը: Վերջինիս կարծիքով ընտրողների մեծ մասն անտեղյակ է ընտրական նոր օրենքի փոփոխություններին, մասնավորապես, քվեարկության էլեկտրոնային կարգին, անգամ նրան, թե ինչ ասել է կուսակցությունների կողմից առաջադրված, այսպես կոչված ռեյտինգային թեկնածու:
«Մարզերի ընտրողները տեղեկատվություն ստանալու բավարար աղբյուրներ չունեն: Օրինակ, Գորիսի պարագայում, կարծում եմ, հանրությանն իրազեկելու լավագույն գործիք կարող էր լինել տեղական հեռուստատեսությունը: Ստեղծված պայմաններում տարբեր ոլորտների մասին տեղեկատվության տարածման հիմնական միջոցը մնում է բանավոր խոսքը, որը մեծ ռիսկ է կրում ինֆորմացիայի աղավաղման տեսակետից»- ասում է թեկնածուն:
Նրա կարծիքով տեղեկատվության մատչելիության, ինչպես նաև առանձին ոլորտներում իրականացվող բարեփոխումների մասին բնակչությունը գրեթե անտեղյակ է, որքան էլ, որ թվում է, թե այդ բարեփոխումներն իրականացվում է ի շահ նրա բարեկեցության ապահովման: Խոսքը, ըստ Մատվեյ Ղազարյանի, վերաբերում է հատկապես համայնքների խոշորացմանը: Այս գործընթացին, ըստ թեկնածուի, հաջորդելու է արտագաղթը, գյուղերի դատարկումը:«Պետությունը բազմաբնակավայր համայնքների ձևավորման հիմքում դրել է ֆինանսական ռեսուսների խնայողության գաղափարը, սակայն հաշվի չի առել, որ դրանով էականորեն կրճատվել են խոշորացման արդյունքում գործազուրկ դարձած բանկիչների, նրանց ընտանիքների դրամական մուտքերը»-ասում է Մ.Ղազարյանը:
Նա միանշանակ կիսում է «Օհանյան-Րաֆֆի-Օսկանյան» դաշինքի նախընտրական ծրագրում արտահայտված այն կարծիքը, ըստ որի արտագաղթը մեր պետության ազգային անվտանգության առաջնային սպառնալիքներից է: Երկրի երիտասարդ, աշխատունակ զանգավածն արտագաղթում է, և դրա կանխարգելման համար անհրաժեշտ են համալիր միջոցառումներ:
Մ. Ղազարյանը արտագաղթը ուղղակիորեն կապում է գործազրկության հետ, որն ըստ նրա պայմանավորված է կրթության ոլորտում առկա խնդիրներով, քանի որ, ըստ նրա չկա հստակ հաշվարկ, թե ինչ մասնագետների կարիք ունի տնտեսությունը և ինչ կրթություն է տրվում ոչ միայն բուհերում, այլև արհեստագործական և միջին մասնագիտական հաստատություններում:
Խոսելով Գորիս համայնքի զարգացման հնարավորությունների մասին, թեկնածուն առանձնապես կարևորում է զբոսաշրջության զարգացումը: Նրա կարծիքով, Գորիսն ունի զբոսաշրջության կենտրոն լինելու բոլոր հնարավորությունները, սակայն եղած ռեսուրսներն «ամբողջությամբ ու գրագետ չեն օգտագործվում»: Նրա կարծիքով զբոսաշրջության զարգացմանը խոչընդոտում է նաև համապատասխան ենթակառուցվածքների բացակայությունը:
Ըստ թեկնածուի, գրեթե բոլոր դաշինքների, կուսակցությունների ծրագրերում երկրի տարբեր ոլորտների նույն խնդիրներն են մատնանշված, տարբերությունը, Մ.Ղազարյանի խոսքով այն է, թե ով ունի քաղաքական կամք դրանք լուծելու համար:
