Անահիտ Բաղդասարյան
Թատրոնի միջազգային օրվա կապակցությամբ, ինչպես նաև թատերարվեստի ոլորտում ցուցաբերած բարեխիղճ աշխատանքի համար Գորիսի Վաղարշ Վաղարշյանի անվան պետական դրամատիկական թատրոնի դերասան Սեյրան Մկրտչյանը պարգևատրվել է ՀՀ մշակույթի նախարարության ոսկե մեդալով և պատվոգրով: Գորիսի Վ. Վաղարշյանի անվան դրամատիկանան թատրոնի տնօրեն, դերասան Շանթ Հովհաննիսյանը, հանձնելով մրցանակը, նշեց, որ «մրցանակը արժևորվում է նրանով, որ տրվում է իր աշխատանքի նկատմամբ մեծ նվիրվածություն ցուցաբերող մարդուն»:
«Այս մրցանակը պարտավորեցնող է, և ես հպարտ եմ, որ Գորիսի դրամատիկական թատրոնում աշխատելու տարիներին եմ ստանում այն»,- ասաց Սեյրան Մկրտչյանը:
ՀՀ մշակույթի նախարարության կողմից պատվոգրի և շնորհակալագրի են արժանացել նաև դերասան Ռոբերտ Աղաջանյանը, դերասանուհի Արինե Ծատրյանը:
Գեղարվեստական ղեկավար Գոռ Մարգարյանը շնորհավորելով մրցանակակիրներին, նշեց, որ միմյանց հաղթանակներով ուրախանալու դեռ շատ առիթներ կլինեն. և «թող որ յուրաքանչյուր ստեղծագործող արժանանա նման պարգևների»:
«Շնորհավորում եմ և վստահեցնում, որ նման պարգևատրումները շարունակական են լինելու, եթե մենք կարողանանք լավ արդյունք ունենալ մեր բարեխիղճ և նվիրված աշխատանքի շնորհիվ»,-ավելացրեց թատրոնի տնօրենը:
