www.datalex.am դատական տեղեկատվական համակարգի տեղեկությամբ փետրվարի 21-ին, ժամը 15:00-ին նշանակված էր Էդգար Համբարձումյանի գործով դատական նիստը, որը, սակայն, չկայացավ: Այդ ժամին նույն դահլիճում տեղի էր ունենում մեկ այլ նիստ, որի մասին www.datalex.am-ում տեղեկատվություն հրապարակված չէր:
Էդգար Համբարձումյանին մեղադրանք է առաջադրվել այն բանի համար, որ նա օժանդակել է Դ.Համբարձումյանին կազմել կեղծ ելքի ֆակտուրաներ: Նույն գործով որպես ամբաստանյալներ ներգրավված են նաև Դավիթ Համբարձումյանը, Ռադիկ Օհանյանը, Սիրվարդ Մինասյանը ,Ժաննա Պողոսյանը:
Դատարանում էր միայն Ժաննա Պողոսյանի հանրային պաշտպան Կարմեն Սահակյանը, ով մեզ հետ զրույցում ասաց, որ տեղյակ էր իր պաշտպանյալի բացակայելու մասին, բայց սպասում էր նիստի կայացմանը:
Մոտ երկու ժամ անց դատարանի աշխատակիցները ոչ պաշտոնապես մեզ տեղեկացրին, որ դատական նիստ չի կայանա, իսկ դատարանի ծանրաբեռնվածության պատճառով այն պաշտոնապես չի հայտարարվի: Նույն աղբյուրների համաձայն դատական նիստը հետաձգվել է մինչև մարտի 30-ը:
«Ես իրավունք ունեմ պաշտպան ունենալու» ծրագիրն իրականացվում է ԵՄ կողմից ֆինանսավորվող «Աջակցություն ՀՀ քաղաքացիական հասարակության կազմակերպությունների կարողությունների հզորացմանը» ծրագրի (“STRONG CSOs” ծրագիր) փոքր դրամաշնորհային նախագծի շրջանակներում «Գորիսի Մամուլի Ակումբ» և «Իրավունքների Տեղեկատվական Կենտրոն» հասարակական կազմակերպությունների կոնսորցիումի կողմից։
Սույն հոդվածի բովանդակության համար պատասխանատվություն է կրում միայն «Ես իրավունք ունեմ պաշտպան ունենալու» ծրագիրը, և այն որևէ ձևով չի արտահայտում Եվրոպական միության տեսակետները:
