Անի Ասծատրյան
Նոյեմբերի 13-ին, Սյունիք ԻնֆոՏանը տեղի ունեցավ Մեդիագրագիտության հերթական խմբի վերջին հանդիպումը, որը նաև անցած մեկ տարվա համատեղ աշխատանքի յուրօրինակ ամփոփում էր:
Մեդիագրագիտության մասին վերջերս շատ է խոսվում, այն կարևորվում է. դրա վառ օրինակն այն է, որ Մեդիա նախաձեռնությունների կենտրոնը Կրթության և գիտության նախարարության հետ համատեղ դպրոցներում հայտարարել էր «մեդիագրագիտության շաբաթ»:
Սյունիք ԻնֆոՏանը անցկացված մեդիագրագիտության դասընթացները մեզ հնարավորություն են տվել ծանոթանալ մեդիայի հետ, սովորել, հասկանալ, բացահայտել այն:
Հաշվի առնելով տեխնոլոգիաների զարգացումը և այն, որ մեր օրերում յուրաքանչյուրս կարող ենք տանը նստած դառնալ ապատեղեկատվության զոհ, ինչու չէ նաև տարածող, մեդիագրագիտության դերը էլ ավելի է բարձրանում:
Ես այսօր կարող եմ ինձ թույլ տալ ասել, որ մեդիագրագետ մարդ եմ, որովհետև կարողանում եմ հնարավորինս տարբերել նյութերի իրական և կեղծ լինելը՝ վերլուծելով դրանք:
Սա ինձ համար ոչ թե սովորական դասընթացների շղթա էր, այլ կյանքի կարևոր դպրոց, որն ինձ ուղեկից է լինելու յուրաքանչյուր ոլորտում, անկախ իմ մասնագիտությունից և աշխատանքի բնույթից։
Շնորհակալություն Գորիսի մամուլի ակումբին՝ մեզ նման հնարավորություն և գիտելիքներ տալու համար, շնորհակալություն Մեդիա նախաձեռնությունների կենտրոնին՝ մեդիագրագիտությունը այսչափ կարևորելու համար, շնորհակալություն մեր թիմին՝ հետաքրքիր աշխատանքի և հաճելի ակնթարթների համար, իսկ ամենամեծ շնորհակալությունը Շուշանին՝ մեզ միշտ ներելու, աջակցելու, նյութը դյուրին ներկայացնելու համար:
Նաև ուզում եմ ներկայացնել մեր խմբի այլ անդամների կարծիքներ.
Աստղիկ Անդրյան. «Ինչ սպասում էի, իրականացավ, կարևորը մեծ սիրով էի մասնակցում, լավ ընկերներ և լավ շրջապատ ձեռք բերեցի, շնորհակալություն գիտելիքների հսկա պաշարի համար»:
Անետա Ասծատրյան. «Մեդիա, մեդիա, մեդիա… Ավտոմեքենայի մեջ, դասարանում, համալսարանում, տանը, դրսում մենք անընդհատ առնչվում ենք մեդիայի հետ: Մենք լսում ենք այն՝ ինչ ասում է մեր դիմացինը, կարդում ենք գրքեր, հետևում համացանցին, սակայն, այս ընթացքում ոչ միշտ ենք կարողանում ճիշտն ու սխալը իրարից տարբերակել, հասկանալ՝ ում հավատլ, ում՝ ոչ:
Իսկ այս հարցերի պատասխանը գտնելու լավագույն տեղը Սյունիք ԻնֆոՏունն է, որտեղ հարցասերների առջև դռները միշտ բաց են: Մեդիագրագիտության դասընթացները մեզ հնարավորություն տվեցին հասկանալ ու սիրել մեդիան»:
Լուսանկարներ մեր դասընթացներից՝
