Սուսաննա Շահնազարյան
Սյունիքի մարզի Տաթև համայնքի ղեկավարի՝ 2018-19թթ որոշումների գերակշիռ մասը վերաբերում է համայնքային սեփականություն հանդիսացող հողամասերը աճուրդ-վաճառքով օտարմանը, գյուղատնտեսական գործունեություն ծավալելու նպատակով վարձակալության իրավունքով հատկացմանը։
2018 թվականի մայիսի 2-ին կայացած համայնքային սեփականություն հանդիսացող հողամասերի աճուրդի արդյունքներով, մրցույթի դրված համայնքի Տաթև բնակավայրի Վանքին հարակից փողոցի՝ թիվ 9 տաղավար հասցեում գտնվող 485քմ բնակավայրերի հասարակական կառուցապատման հողամասը (ծանրաբեռնված 59քմ մակերեսով, շարժական տաղավարներով) հասարակական սպասարկման գործունեություն ծավալելու նպատակով, 25 տարի ժամկետով, կառուցապատման իրավունքով և տարեկան 116 հազար դրամ տարեկան վարձավճարով հատկացվել է Գոռ Մինասյանին։ Նույն մրցույթում վերջինս հաղթող է ճանաչվել նաև նշված տարածքի թիվ 11 հասցեումգտնվող 425քմ հողամասը՝տարեկան հարյուրհազար դրամ վարձավճարով։
Գոռ Մինասյանը հաղթող է ճանաչվել նաև 2018 թվականի փետրվարի 19-ին կայացած աճուրդում, ըստ որի,նրան է օտարվել Տաթև գյուղում գտնվող մոտ 2,8հա (երկու միավոր) գյուղատնտեսական նշանակության հողը՝ տարեկան 210 հազար դրամով։
Գոռ Մինասյանը նաև ավելի վաղ՝ապրիլի 19-ին կայացած աճուրդի հաղթողների թվում է, որի արդյունքներով Տաթև գյուղում գտնվող երկու միավոր, ընդհանուր 1,4 հեկտարի չափով հողակտորները գյուղատնտեսական գործունեություն ծավալելու նպատակովօտարվել է նրան։Ւ դեպ,Գոռ Մինասյանը համայնքի Տաթև վարչական բնակավայրի ղեկավարն է , նրա եղբայրը Տաթև համայնքի ավագանու անդամ է։
2019 թվականի ապրիլի 1-ին կայացած աճուրդի արդյունքներով, մրցույթի ինը լոտից 8-ումհաղթող է ճանաչվել Երևան քաղաքի բնակիչ Սոս Հարությունյանը, ում օտարվել է տարբեր նշանակության 8հա հող, որի համար գնորդը վճարել է 2, 3 միլիոն դրամ:
Խոտ գյուղի «Խոզանոց» հասցեում գտնվող 0,1124 հեկտար «Արտադրական նշանակության օբյեկտների» հողամասը և նրա վրա կառուցված 1076,5 քմ «Արտադրական» շինությունը գյուղատնտեսական գործունեություն ծավալելու նպատակով 2,130 հազար դրամով օտարվել է Սևակ Գառնիկյանին, ով Խոտ բնակավայրի վարչական ներկայացուցչի որդին է։ Սա նշված տարեթվերի ամենախոշոր գումարով օտարումն է Տաթև համայնքում։
2019թվականի օգոստոսի 9-ին հայտարարվել էր Տաթև համայնքի սահմաններում գտնվող համայնքային սեփականություն հանդիսացող հողամասերը գյուղատնտեսական գործունեություն ծավալելու նպատակով վարձակալության իրավունքով հատկացնելու մրցույթ, որը, սակայն, չի կայացել, պատկերը նույնն է եղել նաև կրկնամրցույթին՝ նույն ամսվա 27-ին, որից հետո, հոկտեմբերի 4-ին, համայնքի ղեկավարի որոշմամբ վարձակալության մրցույթի 27, 3 հա հողատարածքներն առանց մրցույթի, ընդհանուր չափով, տարեկան մոտ 400 հազար դրամ վարձավճարով, ըստ դիմումների, հատկացվել է Հարժիս բնակավայրի 26 բնակչի։
Ինչպես տեղեկանում ենք համայնքային իշխանության կայքից, օգոստոսի 15-ին, այնուամենայնիվ, նույն նպատակով մոտ 15 հա-ի համար մեկ այլ մրցույթ կայացել է, որի արդյունքում վարձակալական պայմանագիր է կնքվել 13 հոգու հետ։
2019թվականի հոկտեմբերի 25-ին կայացած, համայնքի սահմաններում գտնվող պետական սեփականություն հանդիսացող հողամասերը գյուղատնտեսական գործունեություն ծավալելու նպատակով վարձակալության մրցույթի արդյունքներով չորս լոտի միակ հաղթող է ճանաչվել Ռազմիկ Բախշյանը, ում գյուղատնտեսական գործունեություն ծավալելու նպատակով վարձակալության իրավունքով հատկացվել է մոտ 140հա հող՝ ընդամենը 362 հազար դրամ տարեկան վարձավճարով։ Ռազմիկն, ի դեպ, ավագանու անդամ Գևորգ Բախշյանի եղբայրն է։
Համայնքի կողմից, առանց մրցույթի, հիմք ընդունելով ավագանու 2019 թվականի մայիսի 8-ի որոշումը, Տաթև համայնքի վարչական տարածքում գտնվող, համայնքային սեփականություն հանդիսացող, գյուղատնտեսական նշանակության հողերից 0,55 հեկտար անհատույց (մշտական) օգտագործման իրավունքով, 25 տարի ժամկետով հատկացվել է «Գործընկերություն և ուսուցում» հասարակական կազմակերպությանը:
Տաթև համայնքի ավագանու 31 հոկտեմբերի 2019թ.-ի նիստում Տաթև համայնքի սեփականություն հանդիսացող Տաթև գյուղի 4-րդ փողոցի թիվ 21 հասցեում գտնվող նախկին մանկապարտեզի շենքն անհատույց օգտագործման իրավունքով տրամադրվել է «Էկո-Երիտասարդություն» հասարակական կազմակերպությանը, այս որոշումը վավերացվել է համայնքի ղեկավարի՝ նոյեմբերի 12-ի որոշմամբ։ Նույն հասցեի հետ կապված, համայնքի ղեկավարը մեկ այլ որոշում է ընդունել 2019թ. դեկտեմբերի 27-ին, այս անգամ նշելով, որ նույն հասցեում «գտնվող անշարժ գույքն անհատույց օգտագործման իրավունքով տրամադրվել է «Էկո-երիտասարդություն» հասարակական կազմակերպությանը՝ 25 տարի ժամկետով»։ Ի դեպ, կազմակերպության զործադիր տնօրենը համայնքի ղեկավարի խորհրդականն է։ Երիտասարդ աղջիկը նաև հաղթող է ճանաչվել համայնքի սահմաններում գտնվող համայնքային սեփականություն հանդիսացող հողամասերը գյուղատնտեսական գործունեություն ծավալելու նպատակով վարձակալության համար 2019թվականի մարտի 25-ի հայտարարված մրցույթում և տասը տարի ժամկետով, տարեկան 174,500 դրամ վարձավճարով վարձակալել 2,55 հեկտար հող։
Տաթև համայնքի ղեկավարի որոշմամբ տեղական բյուջեից սոցօգնություններ չեն տրվում։ Դրա փոխարեն, համայնքապետի՝ 31 հունվարի 2019 թվականի N 07որոշմամբ Գորիսի Հրշեջ-փրկարարական ջոկատի անձնակազմի երեք աշխատակիցների՝ «2018 թվականի ընթացքում մասնագիտական պատրաստվածության բարձր մակարդակի, օպերատիվ և բարեխիղճ աշխատանքի համար «խրախուսել է» նվերներով՝ վկայակոչելով «Տեղական ինքնակառավարման մասին» ՀՀ օրենքի 32-րդ հոդվածի 17-րդ կետը։ Ի դեպ, գրեթե նույն ժամանակահատվածով փրկարարներին, այսպես ասած իրենց երախտիքն են հայտնել, նաև Գորիսի և Տեղի համայնքային իշխանությունները: Վերջինս որոշումը հիմնավորել է հիմնելով Տիմ օրենքի 35-րդ և 38-րդ հոդվածներով։
