Ինչպես տեղեկացնում է Գորիսի համայնքային իշխանության պաշտոնական կայքը, հունիսի 19-ին, ժամը 14-ին, նիստերի դահլիճում տեղի կունենա ավագանու հերթական՝ 4-րդ նիստը, որի նախնական օրակարգում ընդգրկված է 14 հարց:
Քննարկվող հարցերի թվում համայնքի տարածքում գտնվող միշարք հողերի օգտագործման ժամանակավոր սխեմայում դրանց կատեգորիայի փոփոխությանը վերաբերող առաջարկություններ են՝ հիմնականում զբոսաշրջային հանգրվանի, բնակարանների, սպանդանոցի կառուցման համար։ Հողերի կատեգորիաների փոփոխություններ առաջարկվում են Խնձորեսկ, Քարահունջ, Բարձրավան բնակավայրում, Սդղի լճի հարակից տարածքներում։
Օրակարգի մեկ այլ հարցով առաջարկվում է փոփոխություն կատարել համայնքի 2020 թվականի բյուջեում, ինչպես նաև լրացում է նախատեսվում «Գորիս համայնքի կոմունալ ծառայություն» համայնքային ոչ առևտրային կազմակերպության կանոնադրութան մեջ, մասնավորապես,ավելացել են երկու ենթակետեր՝ կանաչապատման աշխատանքների իրականացում և խմելու ջրի մատակարարման և ջրահեռացման ծառայությունների մատուցում։ Թե խմելու ջրի մատակարարման ինչպիսի գործառույթ է իրականացնելու ընկերությունը, հստակեցված չէ, սակայն նույն նիստի օրակարգի մեկ այլ հարցով փոփոխություն է կատարվել նաև կոմունալ ծառայության ընկերության հաստիքացուցակում, մասնավորապես, ավելացել են փոխտնօրենի, հաշվառիչի և փականագործների հաստիքներ։
Միջանկյալ նշենք, որ «Գորիս համայնքի կոմունալ ծառայություն» համայնքային ոչ առևտրային կազմակերպության կանոնադրութան մեջ նշված է այն մասին, որ «Կազմակերպութունը ստեղծվում է Հայաստանի Հանրապետության Սյունիքի մարզի Գորիս համայնքում աղբահանության և այլ բնագավառներում գործունեություն իրականացնելու համար», որին հաջորդող կոնկրետ կետերի մեջ, ի թիվս իր հիմնական գործառույթների, հավելված է՝ «զ) այլ աշխատանքների և գործունեության իրականացում»։
Խնդիրն, ըստ էության, ձևակերպումների մեջ է, հակառակ պարագայում կարելի է ենթադրել, որ ընկերությունը կարող է, օրինակ, հացաթխման աշխատանքներ իրականացնել։
Ավագանու հերթական նիտի օրակարգի մեկ այլ հարցով նախատեսվում է աճուրդով օտարել համայնքի սեփականություն հանդիսացող հետևյալ հողամասերը՝ http://www.goriscity.am/Pages/DocFlow/Default.aspx?a=v&g=2487133a-2166-47d1-80f5-13de611d81a4.
Քննարկման է ներկացված նաև «համայնքի սեփականություն հանդիսացող շենք-շինություններից նախադպրոցական ուսումնական հաստատություններին անհատույց օգտագործման նպատակով տրամադրված տարածքների փոփոխության» հարցը, ըստ որի առաջարկվում է ավելի վաղ ավագանու որոշմամբ Գորիս քաղաքի Վանքի տափ թաղամասի թիվ 16 հասցեում գտնվող հողատարածքում գտնվող նախակրթարանի շենքից անհատույց օգտագործման նպատակով անժամկետ թիվ 7 նախադպրոցական ուսումնական հաստատությանը տրամադրված 1801,2 քմ տարածքընվազեցնել 131.1քմ-ով, սակայն, թե ինչ նպատակով է օգտագործվելու առանձնացված տարածքը, որոշման նախագծում չի նշվում։
Նախնական օրակարգի վերջին հարցով ավագանու հաստատմանն է ներկայացում «Համայնքի վարչական տարածքում աղբահանության» կարգը։ Ի դեպ, ծանոթանալով առաջարկվող կարգի նախագծին, հանրային քննարկման ներկայացվելու դեպքում հնարավոր կլիներ մի շարք դիտարկումներ, առաջարկություններ ներկայացնել։
Սեփ. լրատվություն
