ՏՀՏ ոլորտում առաջատար դիրք ունեցող ընկերությունն այսօր տոնում է հիմնադրման 15-ամյակը։ Բազմաթիվ հաջողություններից Սյունիքի մարզի համար առանձնանում է այն հանգամանքը, որ «Ինստիգեյթ» խմբի ընկերություններից «Ինստիգեյթ մոբայլ» ընկերությունը 2014թ-ից մասնաճյուղ ունի նաև Գորիսում, իսկ անցած տարվանից՝ նաև Կապանում։ Ընկերության ջանքերով ինչպես Հայաստանի այլ, այնպես էլ մարզի մի շարք դպրոցներում գործում են «Արմաթ» լաբորատորիաներ։
Համավարակի անցած ամիսներին ընկերությունը ոչ միայն չի ընդհատել իր գործունեությունն, այլև հունիսին հայտարարել է «Որակի ապահովում, համակարգչային ծրագրավորում և ինժիներական հմտություններ» թեմայով անվճար դասընթացներ Սյունիքի մարզի Կապան և Գորիս քաղաքներում։
Դասընթացի նպատակն է հետաքրքրված և համապատասխան չափանիշեր ունեցող երիտասարդներին ծանոթացնել հիմնարար համակարգային մոտեցումներին, գործիքաշարին և տեխնոլոգիաներին, որոնք անհրաժեշտ են ՏՏ ոլորտում հետագա աշխատանքի համար:
Գորիս քաղաքում դասընթացի մասնակցության հայտ է ներկայացրել ավելի քան 110 երիտասարդ։ Դիմորդների գրեթե կեսը ընտրվել են հարցազրույցների արդյունքում և հուլիսի երկրորդ կեսից կսկսեն մասնակցել նախատեսված դասընթացներին, որի ավարտից հետո ոմանք կմիանան «Ինստիգեյթ Մոբայլի» Գորիսի մասնաճյուղի թիմին, որտեղ այժմ աշխատում է 44 երիտասարդ
Դասընթացի ընդհանուր տևողությունը մինչև վեց ամիս է, դասավանդումն իրականացվում է «Ինստիգեյթ Մոբայլ» ընկերության Գորիսի և Կապանի ինժեներների կողմից։
Առաջիկայում կամփոփվի նաև Կապանի դիմորդների ընտրության փուլը
Սեփ․ լրատվություն
