2019թ․Սյունիքի մարզի Գորայք համայնքում անշարժ գույքի միակ աճուրդը տեղի է ունեցել դեկտեմբերին, որի ընթացքում արդյունաբերության, ընդերքօգտագործման և այլ արտադրական նշանակության գյուղատնտեսական արտադրական օբյեկտների 2,8255 հա մակերեսով հողամասն օտարվելէ 4մլն 68 հազար 800 դրամով, մեկնարկայինից 407 հազար դրամով ավելի գնով:
Համայնքի ղեկավար Աշոտ Աղաջանյանի խոսքով՝ հողատարածքն օտարվել է այն պայմանով, որ համայնքում աշխատատեղեր բացվեն ու ներդրումներ արվեն․ Գորայք համայնքում ոչխարաբուծության զարգացմանն ուղղված նախագծեր են իրականացվում։
«Մեր համայնքում հողերը հենց այնպես չեն վաճառվում։ Նախընտրում ենք հողերը վարձակալությամբ տրամադրել, քան՝ օտարել։ էստեղ պետք է լինեն ներդրումներ ու բացվեն աշխատատեղեր»,-նշում է համայնքի ղեկավարը և ավելացնում, որ ներկայումս այդ տարածքում շինարարական աշխատանքներ են իրականացվում․կառուցվում են ֆերմաներ, կատարվում է բարեկագում, պարիսպապատում, որտեղ 35 մարդ էաշխատում։
Համայնքն ունի 27 հազար հա արոտավայր, որի մոտ 18 հազար հա-ը տրված է վարձակալության։
Գորայքի տարեկան բյուջեն կազմում է 158 մլն, որից միայն 21մլն 950 հզր դրամն է պետական լրավճարը։ Բյուջեի եկամուտների «առյուծի բաժինը»՝ 122 մլնը, վճարում է «Լիդիան Արմենիա» ընկերությունը՝ որպես հողի վարձակալության վճար, տարեկան ևս 2մլն 800 հազար դրամ բյուջե է մուտքագրվում Գորայքի ջրային պաշարներից օգտվող «Կոնտուր Գլոբալ» ընկերությունից։
