Մանե Հարութունյան
Հարցազրոյց Պատմական միջավայրի պահպանության Սյունիքի մարզային ծառայության պետի տեղակալ Անահիտ Գրիգորյան հետ:
-Կուզեի զրույցը ուրախ նոտայով սկսել, բայց մեր հուշարձանները, խնամքի ու մաքրության առումով, մեղմ ասած, տխուր վիճակում են: Ըստ Ձեզ` ո՞վ է այս հարցում թերանում: Գուցե` օբյեկտի՞վ պատճառներով:-Իսկապես, ցավոք` նաև օբյեկտիվ պատճառներով: Գորիսի և նրա գյուղական համայնքների հուշարձանների պահպանության համար պատասխանատու են ընդամենը 6 պահապաններ: Ակնհայտ է` նրանք ֆիզիկապես չեն կարող սպասարկել 5-6 համայնք:
Թե դրան էլ հավելեմ, որ ֆինանսական հնարավորություններ չունենք, նույնիսկ վառելիքի փող չունենք, որ պահապանները տվյալ համայնքներում տեղաշարժվեն: Այս պարագայում, կարծում եմ, անհարկի է նշյալ տարածքների հուշարձանների մաքրությունից ու պահպանությունից խոսել:
-Համագործակցո՞ւմ եք այլ կազմակերպությունների, ուսանողների կամ աշակերտների հետ:
«Բանակ-կրթություն-մշակույթ» համագործակցության շրջանակներում մենք դպրոցներում բաց դասեր ենք անցկացնում, ապրիլին դպրոցականները, բանակի հետ համատեղ, մաքրության աշխատանքներ են կատարում/հուշարձանների և տեսարժան վայրերի միջազգային խորհրդի /ԻԿՕՄՕՍ/ առաջարկությամբ ՅՈՒՆԵՍԿՕ-ն 1982-ից ապրիլի 18-ը նշում է որպես հուշարձանների և տեսարժան վայրերի միջազգային օր/: Հուշարձաններից որոշները, այսպես ասած, կցված են դպրոցներին. Հայրենական մեծ և Արցախյան պատերազմում զոհվածների հիշատակը հավերժացնող հուշարձանները կցված են թիվ 3 հիմնական դպրոցին, Նժդեհինը` 5-րդին, Անդրանիկ զորավարի հուշարձանը, օրինակ, մաքրության կարիք բացարձակ չունի, քանի որ համարյա տան բակում է գտնվում, բայց կցված է թիվ 6 դպրոցին: Շատ լավ կլիներ, որ այս կցումներն անելիս հաշվի առնեին նաև մեր կարծիքը` աշխատանքներն ավելի արդյունավետ կազմակերպելու համար: Բարձրագույն ուսումնական հաստատությունների հետ համագործակցությունը սերտ չէ, համագործակցության նախադեպ ունեինք միայն «Սյունիք» ինստիտուտի ուսանողների հետ:
-Հանրությունը երբևէ նախանձախնդիր եղե՞լ է այս հարցում:
Ինչպես ասում են` մատների վրա հաշված դեպքերում: Մեր բնակչության մեջ դեռ չի ձևավորվել այն գիտակցությունը, որ հուշարձանը մշակութային ժառանգություն է և բոլորինս է` ամեն առումով:
ՀԳ. Ի՞նչ կասեին հուշարձանները, թե խոսեին: Երևի` «Մինչ մաքրությունից խոսելը, մինչ մեղավորներ փնտրելը` նախ մի աղտոտեք…»:
