Գորիս համայնքի ավագանին արտահերթ նիստում համաձայնություն տվեց ՀՀ պետական բյուջեից նպատակային հատկացումներ (սուբվենցիաներ) ստանալու նպատակով Գորիս համայնքի 2021թվականի բյուջետային ֆինանսավորման ներկայացվող երեք ծրագրային հայտերի՝ «Գորիս համայնքի Մաշտոցի փողոցի 230մ հատվածի և Դիտակետի ճեմուղու 450մ հատվածի ասֆալտապատում»,
«Գորիս համայնքի Ակներ բնակավայր տանող մոտեցման երկրորդ գլխավոր ճանապարհի հիմնանորոգում», «Արտաշեսյան փողոցի (Մամիկոնյան փողոցից մինչև Թումանյան փողոցի 950մ հատված) վերանորոգում և ասֆալտապատում»։
Ավագանու անդամ Կարեն Լազարյանը, կարևորելով համայնքում իրականացվող շինարարական աշխատանքները, անդրադարձավ Գորիսի պետական քոլեջի, հանրակացարանի շենքի շրջակայքի բարեկարգման, լուսավորության ապահովման հարցին, նշելով, որ, մասնավորապես, ձմռան ամիսներին հանրակացարան տանող ճանապարհը գրեթե անանցանելի է դառնում։
Ավագանու նիստում որոշում ընդունվեց նաև համայնքային ենթակայության մի շարք հիմնարկներում՝ թիվ 3, Վերիշենի նախակրթարաններ, «Գորիս քաղաքի Գ. Աշոտի անվան մշակույթի կենտրոն», «Գորիս համայնքի բարեկարգում» ՀՈԱԿ-ներ, 9,5 դրույքաչափով նոր հաստիքների ավելացման մասին, որով տեղական բյուջեի ծախսերը ամսական կավելանան 1,555 հազար դրամով։ Հաստիքների ավելացումը, ըստ համայնքապետարանի ֆինանսատնտեսական և եկամուտների հավաքագրման բաժնի պետ Նարեկ Մնացականյանի, պայմանավորված է նախակրթարանում նոր խմբի ավելացմամբ, օրինակելի հաստիքացուցակի ապահովմամբ, ինչպես նաև «Գորիս համայնքի բարեկարգում» ընկերությունում նոր ավտոմեքենաների համալրմամբ։
Ավագանին քննարկեց նաև Որոտան բնակավայրում հողի նշանակության փոփոխության մասին հարց, ինչպես նաև ի գիտություն ընդունեց համայնքի բյուջեի ընթացիկ տարվա առաջին եռամսյակի կատարման հաշվետվությունը, ըստ որի եկամուտներն ապահովվել են 24,6, ծախսերը՝ կատարվել մոտ 21 տոկոսով:
Սեփ․ լրատվություն
