«Գորիսի մամուլի ակումբ» ՀԿ-ն մտահոգ է, որ հանրապետությունում վերջին տարվա ընթացքում հնչեցվող ատելության խոսքը քաղաքական բանավեճը անձնական վիրավորանքների և սպառնալիքների դաշտ է տեղափոխել և խոչընդոտում է ընտրական գործընթացներում քաղաքական ուժերի ծրագրերը ներկայացնելուն ու քարոզարշավի բնականոն ընթացքին։ Որոշ դեպքերում շահարկման թեմա է դառնում Սյունիքի անվտանգության հարցը։
Այդ նպատակով մենք դիմում ենք հոկտեմբերի 17-ին Գորիս, Տեղ, Տաթև համայնքներում տեղական ինքնակառավարման մարմինների համամասնական ընտրակարգով կայանալիք ընտրությունների թեկնածուներին, նրանց առաջադրող քաղաքական կուսակցություններին, դաշինքներին, կոչ անելով բացառել ատելության խոսքը, թեկնածուների նկատմամբ խտրականության դրսևորումը, հավասար պայմաններ և հնարավորություններ ապահովել ընտրապայքարի բոլոր թեկնածուների համար։ Սա այն հնարավորությունն է, որն, իսկապես, կարող է ազդեցություն ունենալ Սյունիքում մարդու անվտանգության միջավայրի ձևավորմանը։
Գորիսի մամուլի ակումբ ՀԿ
