Գորիս համայնքում տեղի ունեցավ համամասնական ընտրակարգով 2021 թվ․ հոկտեմբերի 17-ին ընտրված նորընտիր ավագանու անդրանիկ նիստը։ Ներկայացված օրակարգային հինգ հարցերից քննարկվեց մեկը։ Մյուս հարցերի հետաձգումը պայմանավորված էր այն հանգամանքով, որ հոկտեմբերի 9-ին կայացած ավագանու համամասնական ընտրությունների արդյունքում մեծամասնություն կազմող «Առուշանյան դաշինք»-ի նախընտրական ցուցակը գլխավորող, համայնքի գործող ղեկավար Առուշ Առուշանյանի կողմից, ով գտնվում է անազատության մեջ, վավերացված անհրաժեշտ փաստաթղթերը դեռևս հասանելի չէին ավանգանու անդամներին։
Ավագանու անդամ, նախկին փոխհամայնքապետ Մենուա Հովսեփյանը շնորհավորեց Առուշ Առուշանյանին վերընտրվելու կապակցությամբ:
Չնայած «Տեղական Ինքնակառավարման մասին» օրենքի 16-րդ հոդվածով նախատեսվում է, որ նորընտիր ավագանու առաջին նիստը վարում է համայնքի ղեկավարը կամ նրա պաշտոնակատարը. ովքեր ունեն խորհրդակցական ձայնի իրավունք, այնուամենայնիվ, նիստը վարեց «Առուշանյաններ» դաշինքը ներկայացնող ավագանու անդամ Արմենուհի Սոնյանը։
Խոսնակը ներկայացրեց Գորիս համայնքի ավագանու նորընտիր կազմին, ըստ որի «Առուշ Առուշանյան» դաշինքից ավագանու կազմում ներառվել է 13, «Քաղաքացիական պայմանագիր» կուսակցությունից՝ յոթ և «Հայ ազգային կոնգրես» կուսակցությանից՝ մեկ ավագանու անդամ:
Օրակարգային երկրորդ հարցը վերաբերում էր Գորիս համայնքի ավագանու խմբակցությունների ստեղծմանը։ Հարցի մասին զեկուցեց Գորիսի համայնքապետարանի գլխավոր մասնագետ Սուրիկ Ծատրյանը, ով ներկայացնելով ՏԻՄ օրենքի 66–րդ հոդվածը, նշեց, որ կուսակցությունները պետք է ստեղծեն խմբակցություններ, ըստ որի խմբակցությունը համայնքի ղեկավարին գրավոր ներկայացնում է իր կանոնադրությունը, անվանումը, կազմը, ղեկավարի և քարտուղարի տվյակները, որոնք նիստը վարողը հրապարակում է ավագանու առաջիկա նիստում: Հիմք ընդունելով ՏԻՄ օրենքի 66–րդ հոդվածը և ՀՀ թիվ 34 ընտրատարածքային ընտրական հանձնաժողովի հոկտեմբերի 17–ի 40ա որոշումը՝ զեկուցողը ներկայացրեց, որ ավագանին կարող է ստեղծել երեք խմբակցություն։
Օրակարգային հարցերից դուրս Մենուա Հովսեփյանը ներկայացրեց համայնքի գործող ղեկավարի կառավարման տարիներին իրականացված տարբեր նախաձեռնություններ։
Ավագանու անդրանիկ նիստին մասնակցում էր նաև Սյունիքի փոխմարզպետ Կարո Ավանեսյանը, ով շնորհավորելով նորընտիր ավագանու կազմին, կոչ արեց «մի կողմ թողնել բոլոր ամբիցիաները, միավորվեն, մի բռունցք դառնան և անցնեն գործի, քանի որ համայնքում կան մի շարք խնդիրներ»։
Նոյեմբերի 10–ին, ժամը 16։00–ին նշանակվեց արտահերթ նիստ, որի ընթացքում կքննարկվեն օրակարգային մյուս հարցերը։
Լրագրող
