Սյունիքի մարզի Գորիս համայնքում սուբվենցիոն ծրագրերի միջոցով լուծվում են համայնքային տարբեր խնդիրներ։ Համայնքի ղեկավարի տեղակալ Իրինա Յոլյանը նշում է, որ համայնքում բազմաթիվ նախագծեր են իրականացվում, որոնց մի մասը ֆինանսավորվում է պետական և տեղական բյուջեների համատեղ ռեսուրսներով։ Ըստ նրա, ներհամայնքային ճանապարհների բարեկարգումը հիմնականում իրականացվում է սուբվենցիոն ծրագրերով։
Կախված սուբվենցիոն ծրագրերի բնույթից, համայնքի ներդրումը կարող է տարբեր լինել։ Սահմանված կարգի համաձայն, նախ համայնքի բյուջեից է ներդրում կատարվում, ապա ֆինանսավորվում է կառավարության կողմից։
2024 թվականի համար Գորիս համայնքի խնդիրների լուծման համար իրականացվում է սուբվենցիոն երեք ծրագիր.
- Թումանյան փողոցի նորոգում․ ընդհանուր արժեքը՝ 180 մլն դրամ, որից պետությունը տրամադրում է՝ 99 մլն դրամ,
- Անկախության փողոցի մայթերի և հարակից փողոցների բարեկարգում ընդհանուր արժեքը՝ 866 մլն 938 հազար դրամ, պետական համաֆինանսավորումը՝ 476 մլն 816 հազար դրամ։
- Պատմական Հին Գորիս տանող ճանապարհի հիմնանորոգում, ընդհանուր արժեքը 380 մլն դրամ, որից պետական համաֆինանսավորումը՝ 209 մլն դրամ:
«Սուբվենցիոն ծրագրերն իրականացվում են առաջնահերթություններից ելնելով, օրինակ` եթե մենք այսօր նորոգում ենք Գորիս գյուղ գնացող ճանապարհը, դա պատահական չէ, հաշվի է առնվում, որ որպես զբոսաշրջային քաղաք, այդ տարածքը կարող է հետաքրքրել զբոսաշրջիկներին, և մենք ապահովում ենք բավարար հաղորդակցություն։ Ներհամայնքային ճանապարհների առաջնահերթության առումով հաշվի է առնվում թաղամասի, փողոցի բնակության խտությունը»,- ասում է համայնքապետարանի քաղաքաշինության և կոմունալ տնտեսության բաժնի պետ Գարեգին Փարսյանը: Նրա խոսքով, հնարավոր է, որ պետական ռեսուրսների ավելի մեծ ծավալ ներդրվի սուբվենցիոն ծրագրերում, սակայն համայնքը դրա համար համապատասխան ներդրում պիտի կարողանա ապահովել, բացի այդ համայնքային ոչ բոլոր խնդիրներն են վերաբերում շինարարությանը։
Բացի արդեն իրականացված ծրագրերից, նախագծման փուլում են Գորիս քաղաքի Գետափնյա թաղամասի թիվ 2, 6 շենքերի մանսարդային հարկերի բնակելի տարածքների կառուցման աշխատանքները, Շառլ Ազնավուրի անվան երաժշտական դպրոցի շենքի նորոգումը, թիվ 1 և 7 նախակրթարանների շենքերի հիմնանորոգման աշխատանքները:
