1994-ից ի վեր՝ մայիսի 3-ին նշվում է Մամուլի ազատության միջազգային օրը (World Press Freedom Day): Նախաձեռնությունը ՅՈՒՆԵՍԿՕ-ի գլխավոր համաժողովինն է: ՄԱԿ-ի գլխավոր ասամբլեան այն տոն է հռչակել 1993-ի դեկտեմբերի 20-ին:
Մեր երկրում վերջին տարիներին բազմաթիվ նախաձեռնություններ են իրականացվում՝ աջակցելու տեղեկատվության մատչելիության, տեղեկատվության աղբյուրների հասանելիության ապահովման, անկախ մամուլի զարգացման, կայացման, մեդիագրագիտության մակարդակի բարձրացման համար։
Սակայն, այսօր էլ մամուլի ազատությանը խոչընդոտող բազմաթիվ խնդիրներ կան, ինչպես, օրինակ, լրատվամիջոցների մի մասը կախված է դրանց սեփականատերերից, որոնք ունեն իրենց քաղաքական կամ տնտեսական անձնական օրակարգերը։
Բացի այդ, չնայած ՀՀ Սահմանադրության 27-րդ հոդվածը սահմանում է, որ «Յուրաքանչյուր ոք ունի խոսքի ազատության իրավունք, ներառյալ՝ տեղեկություններ և գաղափարներ փնտրելու, ստանալու, տարածելու ազատությունը, տեղեկատվության ցանկացած միջոցով՝ անկախ պետական սահմաններից», այնուամենայնիվ, տեղեկատվության մատչելիության հասանելիության առումով անհամաչափություն կա։ Խոսքը վերաբերում է ոչ միայն թվային գրագիտության բավարար հմտություններին, այլև այն հանգամանքին, որ ընդունված է կարծել, թե օնլայն լրատվամիջոցները, համացանցային տեղեկատվական դաշտը բավարար տեղեկատվական աղբյուրներ են՝ լիարժեք ապահովելու հանրության տեղեկատվական պահանջարկը՝ առանց հաշվի առնելու աշխարհագրական տարածությունը։ Տեխնիկական իմաստով՝ թերևս, սակայն պահանջարկի առումով մարզային խնդիրները, անցուդարձը կապված են այսպես կոչված «համապետական» լրատվամիջոցի սուբյեկտիվ հետաքրքրվածության հետ, և շատ հաճախ մարզում բնակվող քաղաքացու ձայնը լսելի չէ։
Եվ ռեսուրսները, որոնք այսօր նախատեսվում են Հայաստանում մամուլի ազատության ուղղությամբ, բավարար հասանելի պիտի լինեն նաև այդ հնարավորություններն ապահովելու համար։
