«Ես գյուղի մարդ եմ, քաղաքը իմը չի, Կոռնիձորն էլ Արցախին մոտ է, նույն օդն է, նույն հողը»,- ասում է Նվերը:
Նվեր Հովսեփյանը Արցախից է տեղահանվել 2023 թվականի բռնի տեղահանության ժամանակ, մի քանի ամիս ապրելով քաղաքում, որոշել է ընտանիքի հետ միասին բնակվել Կոռնիձոր բնակավայրում ու զբաղվել թռչնաբուծությամբ:
-Ամեն ինչ սկսեցինք զրոյից, երկար էի մտածում, թե ինչով զբաղվեմ, որ և եկամուտ ստանամ, և տարածաշրջանում պահանջարկ ունենա, ու էդպես սկսեցի լոր պահել:
Կոռնիձորում Նվերն ու իր ընտանիքը դեռ վարձով են ապրում, բայց նպատակ ունեն սեփական տունը գնել, բիզնեսը ընդլայնել:
Սկզբում դժվար է եղել, փորձի պակասի պատճառով թռչունների կորուստ շատ է ունեցել, սակայն համառությունն ու ամենօրյա աշխատանքն օգնեց հմտանալ:
Հարևան գյուղերից շատերն են հետաքրքված լորաբուծությամբ, հաճախ են գնում Կոռնիձոր՝ Նվերի փորձը տեսնելու համար, ինքն էլ մեծ սիով կիսվում է իր խորհուրդներով:
«Կոռնիձոր գյուղում հողը հայտնի է իր բերրիությամբ, էստեղ ճանապարհի եզրին էլ է կանաչի աճում, անգամ ձմռաը, որն առանձնանում է իր յուրահատուկ համով և հոտով»,- ասում է Ժիրայրը:
Պատերազմից հետո Կոռնիձորը դարձավ սահմանամերձ, ինչն իր հետ բերեց նոր մարտահրավերներ: Անասնապահությամբ զբաղվելը դժվարացավ, Ժիրայրը որոշեց ունեցած հողատարածքն օգտագործել առավել արդյունավետ և գրագետ:
«ՀիմնաՏավուշ» զարգացման հիմնադրամի օգնությամբ երեք ընտանիք միացել և միասին հիմնել են ժամանակակից ջերմոցներ, և սահմանամերձ գյուղում այսօր զբաղվում են բանջարեղենի, կանաչեղենի արտադրությամբ։
Ժիրայրի համար սա պարզապես բիզնես չէ, այլ սեփական հողին տեր մնալու և սահմանամերձ գյուղը զարգացնելու միջոց:
Վերջին տարիներին «ՀիմնաՏավուշ» զարգացման հիմնադրամը Սյունիքի մարզի բնակավայրերում իրականացնում է սոցիալ-տնտեսական ծրագրեր՝ ուղղված ինչպես տեղի բնակչության, այնպես էլ Արցախից տեղահանվածների կենսամակարդակի բարձրացմանը։
Գյուղատնտեսության ոլորտում հիմնվել են պտղատու ծառերով ինտենսիվ այգիներ, ջերմոցներ, տրամադրվել հազարավոր գլուխ կենդանիներ, խոտհնձիչներ և էլեկտրական սղոցներ։ Զուգահեռաբար զարգացել են ենթակառուցվածքներ, տեղադրվել արևային կայաններ, ջրատաքացուցիչներ, վերանորոգվել ջրագծեր ու լուսավորության ցանցեր։
Որպեսզի այս ներդրումները լինեն արդյունավետ, բնակիչների համար կազմակերպվել են մասնագիտական դասընթացներ։ Շահառուները հնարավորություն են ստացել մասնագիտանալու այգեգործության, մեղվաբուծության և անասնաբուժության ոլորտներում՝ ստանալով անհրաժեշտ գիտելիքներ ժամանակակից գյուղատնտեսություն վարելու համար։
